被指元旦日衝擊中聯辦兼喺舊年11月29日反高鐵大遊行嘅港大女生陳巧文，早前被警方以襲警罪拘捕，佢噚日同朋友去灣仔警察總部報到，獲准以500元續保，下月18日再報到。警方對陳巧文前來如臨大敵，出動十幾個警察戒備外，又用鐵馬封咗正門入口。點知陳巧文一行人乜嘢示威口號都冇，續保後乖乖企喺警署門口接受訪問，之後就散水。
陳巧文同八方講，以前曾有啲襲警畸屎拖成半年，警方都冇正式落案起訴，令被捕人士非常困惑。佢話佢嘅個案拖咗成個月，警方都好似冇乜實質證據告到佢，但令佢最煩嘅就係個個月要到警署續保，好似返學簽到咁。
由於陳巧文有啲唔舒服，遲咗成半粒鐘，傍晚6點先到警署。冇人示威，警察叫好，可以和和氣氣收隊離場咁話。