正所謂新正頭，過年買鞋實俾長輩話嚡嚡聲，意頭唔好兼會帶來運滯之嫌。不過一眾80、90後，就話後生細仔兼人紅就咩都唔怕，JaniceMan（JM）就係最佳人辦。踏入年初九，JM就身先士卒，去Catalog行個大運，為大家嚟個新季鞋款巡禮。
文︰占占咪
攝影︰楊錦文
JaniceMan新鮮代言
Catalog一向畀人印象青春活力兼色彩鮮艷，所賣的牌子都是年輕一代最愛，例如Nike、adidas、Reebok、NewBalance、Converse等等，今次找來JaniceMan作示範，感覺十分貼切，連帶即將推出的廣告，亦是由JM擔任，似乎是看重她的青春氣息。新一季的Catalog，率先以Sneakers打頭陣，當日拍照所見的鞋款，都是以鮮色為主，少有易穿易襯沉色選擇，明顯地表示，大眾過去所喜愛的沉色系列已經不再，取而代之是紅、橙、黃、綠等搶眼顏色。或者，又可以說，大部份人最多只能接受腳下的鮮艷，而未能接受身上過於奪目的顏色，但相信假以時日，大眾對於身上顏色的運用會越來越大膽。
JM愛長又愛短
說回今期主角JaniceMan，自從再出山之後，少女味明顯減淡，反而女人味逐漸增強，會唔會導致佢着高踭鞋多過着Sneakers呢？聽佢講落又唔會，而且更有自己一套襯鞋技巧：「其實高筒低筒鞋我都會着，而我自己就會Prefer着低筒多啲，因為可以Show番對腳嘅線條長啲；但感覺上高筒又會着得型啲，睇上去好似好多層次，又可以襯唔同嘅Leggings。如果唔嫌熱嘅話，仲可以套番對LegWarmer，因為可以多番層次，望落去唔會咁單調。」嗱嗱嗱，咪再話Sneakers最多只可以襯T恤牛仔褲，聽JM話，最緊要層次呀！
貼士必入天然貝
剛剛過緊新年，SS10就好似洪水海嘯，係咁衝過嚟，唔好話我哋呢班時裝記者，就算Artist們都要知道最新季度會流行乜衫乜鞋，若果唔夠FashionSense而空有靚骨架，着唔出型格味就慘！所以JM自己一向都有刨開時裝雜誌，熟知潮流走勢，OK，等小記問問JM今季會入咩貨先？「如果Summer嚟講，我都係會主張Colourful啲開心啲，同冬天最大出入一定係顏色。雖然我自己就係偏沉色嘅人，但係到咗春天，都係想着衫嘅感覺似番夏天，所以會着鮮色啲嘅衫，例如有Shocking的顏色。同埋我會選擇雪紡系列，以及好輕嘅Lace。而家陣就好興天然嘅產品，例如貝殼類，因為睇咗好多雜誌嘅Accessories都用咗好多貝殼去做，咁呢類都係好夏天嘅嘢。」大家聽完之後，夠料入貨未先?!
Catalog（25063928）
銅鑼灣時代廣場6樓607-608號舖