早幾日天寒地凍，唔單止人瑞頂唔住，連一班平日活力充沛嘅80後都打敗仗。公民黨噚日喺旺角行人專用區搞咗個80後論壇，本來約咗港大女生陳巧文做講者，點知佢一朝早就唔舒服，嘔到七彩，臨時甩底。陳巧文早排俾警察告襲警單案今日開庭，祝佢好運。
出席論壇嘅高登網民周諾恆都唔係好妥，開咪講講吓突然覺得頭暈暈。好彩有MissMo主持大局，佢兩個仔都係80後，都算冇冷場。講開80後，公民黨都吸收唔少年輕人加入，其中一位講者葉鈞浩，本身就讀緊理工大學。鈞浩嘅爸爸係職工盟香港郵政員工會主席葉錦富，佢話對政治有興趣，公民黨又較多政治活動，所以今次入會自己揀。