任賢齊前晚到澳門舉行「任賢齊星級晚宴演唱會」，其間小齊大派禮物，又不時抱抱女觀眾，擔任特別嘉賓的農夫指小齊封了兩封合共六位數的利是給他們，不過小齊澄清利是只是一張簽名相。
任賢齊的「任賢齊星級晚宴演唱會」前晚於澳門新濠天地舉行，到場睇騷的藝人包括關心妍與老公楊長智、李樂詩與老公、任葆琳、四洲集團太子女戴凱欣及莊思敏等。小齊於表演期間落台大派幸運曲奇，又不時錫錫女觀眾的面頰及抱抱她們，場面十分熱鬧。適逢前日是人日，在場又有一名觀眾生日，小齊即引領全場觀眾一起合唱生日歌。
「心意有好多零」
擔任表演嘉賓的農夫與小齊合唱賀年歌《紅包拿來》，事後問農夫為何不落台利是？他們說：「我哋本來預備咗一首15分鐘嘅歌，後來冇用到咪冇時間落台，不過小齊喺後台封咗大利是畀我哋。」農夫表示小齊所封的兩封利是合共有六位數，問到二人有否作大？他們說：「啲同事話有6位數，因為之前小齊問我哋要幾多，我哋答佢6位。」
不過其後小齊指利是數額沒那麼多，他說：「冇咁誇張，佢哋咁講我好大壓力，心意就有好多個零，其實係一張簽名相。」此外，小齊表示以往不喜歡擔任晚宴的表演嘉賓，因為擔心在場的觀眾只顧吃飯而沒有反應，他說：「今晚啲觀眾好熱情，今晚真係好開心。」小齊又透露前日是兒子的農曆生日，他與兒子一起切蛋糕慶祝。
採訪：胡比
攝影：陳慧安