好多老闆覺得朝9晚5早已經名存實亡，7-11先至係打工仔每日工作時間表。不過，地產商新世界集團嘅第三代揸Fit人就唔認同呢種做法，佢話要替集團帶來工作要有樂趣，生活需要平衡嘅企業文化喎。
鄭志剛最近同同事大談工作與生活嘅哲學，佢話大學畢業後去咗一間投資銀行捱世界，開工第一日，上司開宗明義話嗰度係日夜顛倒、7天工作、24小時服務嘅戰場。幾年後，鄭志剛慢慢習慣沒日沒夜嘅工作同生活，但人嘅圈子越來越窄，於是更加依賴工作。幾年喺外面嘅經驗，令佢體會到無論點樣忙碌，都要喺工作縫隙中尋找屬於自己嘅生活空間。
要工作與生活平衡
新婚冇耐嘅佢揚言，家返到集團做嘢，希望為集團帶嚟新企業文化，同同事一齊追求平衡嘅生活。於是佢着力增加醫療福利、公司互動嘅溝通平台，更希望透過成立員工康體會，又成立義工隊參與社區服務。佢話當上司與同事成為志同道合嘅生活夥伴，工作與生活平衡，就能夠注入活力。
如果新世界真係可以削減員工工時，打工仔自然拍掌。唔知道鄭志剛會唔會支持勞工界爭取嘅標準工時呢？