美國聯儲局上周四調升貼現率0.25%至0.75%，係06年6月以來首次，亦可謂出其不意，無論有關動作係咪加息前奏都好，訊息使人感覺此舉係唔想銀行好似往時一樣咁易向央行借到平錢，所以對投資市場而言，其實唔係一件好消息。
今日年初九大陸股市復市，若然表現不濟，港股就比較麻煩，早前大市升至20780受阻，今次反彈至20684已完，可能要回試2月低位19400水平。
市況波動難測，入市只宜選優質股兼不能大貪。華潤創業（291）歷年多番重組後，儼然已成為消費股，食正內需潮流。華創旗下超市若以市佔率計，位列龍頭，目前約有2700家超市，受惠今年所謂「超市下鄉」政策。
不過，超市業務一向毛利率低，故集團扭盡六壬務求提升利潤率；加上啤酒業務盈利持續上升，未來呢兩瓣業績肯定有睇頭。
華創今年亦具回歸A股概念，市況一就，股價就會飛天，候回至23元至24元之間買貨，中線目標30元。
方星俠