音樂才子盧廣仲前晚喺九展StarHall舉行一連兩場《OhYeah！香港演唱會》，有fans以冬菇頭及黑框眼鏡的盧廣仲look捧場，搞到出現多個A貨，認真搞笑。當晚唔少圈中人捧場，葛民輝罕有地同老婆Mini一齊出現，但Mini依然戴上cap帽保持低調。另外日前先同傳斷背嘅何韻詩着情侶裝去睇張敬軒演唱會嘅容祖兒，轉軚同青靚白淨男伴排排坐睇騷。
表演甩嘴兼蝦碌
當晚現場氣氛熱烈，盧廣仲好應節咁恭喜大家，除咗唱自己歌曲外，盧廣仲亦有唱莫文蔚同米高積遜（MichaelJackson）嘅歌，佢仲大跳勁舞，但舞姿就唔敢恭維嘞！盧廣仲當晚唱歌時有甩嘴、入錯key兼要睇螢光幕嘅歌詞，表現蝦碌烏龍，雖然有錯漏，但fans依然鬼咁熱情，結果兩度「安哥」先完場。
祖兒噚日就出席喺尖沙嘴舉行嘅《公益金慈善義賣日》，只要買佢嘅新碟就可以得到簽名，仲有海報同公仔義賣，目標希望籌到20萬。講到前晚祖兒同男友人睇盧廣仲嘅騷，問嗰位係邊個？祖兒笑住話：「佢係我朋友嘅男朋友，你哋有留意咩？咪以為我得米，大家誤會，家連粒米都未有，有實同大家講。」
