曼聯嘅威爾斯靚佬中場傑斯，可以喺英超踢到36歲，全因佢唔學似一般英超球星咁夜蒲女，靜靜哋同家人喺索爾福德（Salford）過優哉游哉嘅生活。
阿媽住附近同佢嘆茶
91年以17歲之齡幫曼聯喺英甲（現時英超）比賽嘅傑斯，後生嗰陣都有四圍玩，而且狂買D&G、Gucci同勞力士等名牌，但人大咗反而歸於平淡；即使佢仲係滿身名牌，但配搭一啲都唔浮誇，望落去夠舒服自然。傑斯揸嘅戰車亦由以往嘅法拉利變咗家陣嘅賓利，佢亦唔會用呢部價值16萬鎊戰車嚟同人鍊，只係用嚟代步。
家傑斯同佢女人施蒂絲（StaceyCooke），以及兩個細路利比（Libby）同埋薩治（Zach），一齊住喺一間維多利亞式建築、價值400萬鎊嘅豪宅。雖則冇同媽咪一齊住，但傑斯係個好孝順同傳統嘅男人，所以安排阿媽住喺附近，方便日日一齊嘆下午茶。除咗約阿媽，有時傑斯亦會約朋友同爹哋，去酒店入面嘅酒吧睇欖球比賽。家陣傑斯因為手骨骨裂而要唞幾個禮拜，睇嚟佢大把時間陪屋企人。
傑斯嘅優游生活，令佢36歲人仲可以喺英超角逐，舊年年尾仲力壓F1車手畢頓，當選BBC嘅09年體壇風雲人物；之前佢同曼聯再續約多一年，留效至2011年6月，但佢咁識養生，隨時踢到40歲都冇問題。