年薪最少有375萬元嘅西九文化區行政總裁職位即將名花有主，據知西九管理局轄下嘅遴選小組已鎖定最後兩強，於本月22號進行最後面試，若一切順利，最快下個月就可以公佈人選，年中上任。
八方收到風，兩個候選人都唔係香港人，而係來自歐洲、對當代藝術有深厚認識嘅專業人士。西九文化區涉及多方利益，真正「地雷」處處，以夷制華對付批評聲音，係比較穩陣選擇，至少保證暫時唔係退休高官俱樂部。
不過如此崇洋可能觸痛本地藝術界人士自尊心，所以行政總裁之下嘅幾個行政總監都有香港人或華人角逐，其中表演藝術政策行政總監肯定係香港人做，因為遴選名單上最後兩強都係香港人，總之用人唯才之餘，分餅仔都十分均勻。
去年上任嘅西九行政總監（項目推展）程少泉返工一星期就突然劈炮，今次請行政總裁由政務司司長唐公子親自面試，怕且冇咁兒戲啩。