小甜甜龔如心世紀爭產案暫時告一段落，輸家「哨牙通」被警方拘捕兼搜屋，呢個新年都唔慌太開心，噚日仲有消息指佢向法庭申請延期一個月提出上訴，希望爭取多啲時間諮詢法律意見。
滿場飛招呼賓客
贏家華懋方面梗係喜氣洋洋，華懋主席龔仁心噚日喺鄉議局新春酒會現身，笑晒口咁話呢個新年係近年最開心嘅新年。
鄉議局新春酒會喺如心廣場舉行，龔仁心打一條紅呔，好似半個主人家咁滿場同人打招呼，佢透露農曆年期間同埋母親等一家人去咗泰國避年兼避寒，香港近日咁鬼凍，去到泰國就熱辣辣，幾乎樂而忘返咁話。
發叔為鄉議局新大樓建築工程四出籌款，八方問龔仁心有冇贊助，佢一貫龔家人慳家作風，指爭產官司未完全結束，唔可以貿然動用資產，捐錢嘅事容後再談。