自稱代表香港求籤望車公指點迷津嘅鄉議局主席劉皇發，一言一行隨時影響香港運勢市民福祉，噚日佢老人家又開金口，批示來年「官不聊生」，事關家陣人人有言論自由，隨時可以痛罵高官，為官不易，做市民過癮好多。
昨新春團拜 自動波解籤
鄉議局噚日舉行新春團拜，今年應該係最後一次借用如心廣場做團拜，因為鄉議局沙田新大樓今年落成，兔年可喺新大樓團拜，而自由黨前主席田少都慷慨捐出20萬元贊助工程，顯示同發叔真係冰釋前嫌，不過田少噚日冇現身，由自由黨主席劉健儀做代表。
發叔身為主人家，唔使問車公，笑言現時香港冇民不聊生呢回事，反而做官就唔容易，真係「官不聊生」咁話。八方雖然都未捱過真正民不聊生苦日子，但都未見識過「官不聊生」，好彩發叔自動波「解籤」。
發叔話好似早前審議高鐵撥款咁，官員要喺立法會內坐足三日，喺議事廳內俾議員質問，出到外面就面對市民批評，佢話雖然香港係多元化社會，唔同人有唔同取態，但應該以平和理性方式表達意見，唔應該濫用激烈挑釁手段破壞社會和諧安寧。
特首煲呔同好多局長、高官噚日都有去團拜，發叔說話真係啱聽，佢更鼓勵官員要迎難而上。發叔講到做官咁委屈，實情冇人用槍指住班人做呢份月收二、三十萬元人工嘅工個噃，如此高薪厚祿，退休後仲分分鐘有得翻閹，或者幫富豪打工，咁都算「官不聊生」？
官員肯用腦 肯定少煩惱
位高權重嘅人，俾市民鬧兩句，批評吓有乜損失呢？市民可以扣高官人工咩？可以要高官下台？八方就冇咁儍咁天真，如果官員肯用吓個腦，唔好提出啲擾民措施，唔好一味益大財團、大地產商，又點會俾人鬧呢！官員好似動輒得咎，唔係好似發叔咁講，因為香港有言論自由，反而係因為香港人只有言論自由，只可以用把口鬧，如果呢個政府係民選產生，早就用選票趕廢柴高官落台啦，仲容得下發叔你老人家坐在行會之內？
mailto:[email protected]