呢個Topic已拍過N咁多次，齋睇原著內容，你話唔悶就假！論演繹手法，最深印象係早幾年Disney翻兜做卡通，令花木蘭成為荷李活巨星紅人；今次新版《花木蘭》改由馬楚成搭趙薇，代父依然，但劇情內甚少武打場面，反變成愛情文戲，似「從君」多啲喎！
記者：陳國輝
感情戲為主線
睇過《花木蘭》真人版或卡通版嘅朋友為數唔少，特別係八十後呢一代，對Disney版本應該有較深印象。故事發展係點，唔再多講，反值得一提係，今次有別於傳統《花木蘭》電影，以拳腳功夫作為SellingPoint。
呢集用感情線為主導，代父從軍不在話下，即使潛入軍營，花木蘭仍以手足之情，甚至愛情為重，所謂國家大事，不過在結尾時才輕輕帶過。點都好，叫趙薇耍花拳繡腿，倒不如拍齣古代感情戲仲好。
DVD版零Bonus
今次同時推出DVD以及Blu-ray版，分別係，Blu-ray再加插導演專訪、幕後花絮，最正嘅係收錄埋由孫燕姿主唱嘅《花木蘭》主題曲，總算交足功課；不過睇DVD版就無咁好彩，入面乜Bonus都無，只得最基本嘅選擇片段、語音以及字幕，可一提係，雙版本同時提供廣東話和國語配音，要欣賞原汁原味感覺，建議揀番國語版。
戰爭場面跌Watt
睇國產古代戰爭片，卡士不嬲好勁，人多勢眾不特止，武將單挑、擺陣式、佈局、排陣，絲絲入扣。本來小記對《花木蘭》都有呢份期待，只可惜希望越大、失望越大，去到戰爭場面嗰陣，人依舊眾多，但除咗亂箭橫飛，幾乎睇唔出有乜佈局和策略，假如想感受吓《三國》嗰份殺敵氣氛，根本無可能出現，純以戰場排場嚟講，《花木蘭》都算弱。
故事背景
BackgroundStory
喺北魏時代，花木蘭與父親花弧相依為命，受父親影響下，佢從小喜歡習武，甚至乎偷睇兵書陣法，因而練得一身好武功！直至十八歲嗰年，外族柔然犯境，花木蘭唔忍心睇住老父被徵召上戰場，於是女扮男裝，替父從軍，更於營內結識到文泰，產生深厚感情。
$72（DVD）/$199（Blu-ray）
查詢：DVDPro（23326326）
