楊千嬅第一年以丁太身份派利是，佢早幾日同余文樂、導演彭浩翔同一班電影《志明與春嬌》台前幕後人員食開年飯，順便預祝套戲下月底上映大賣。丁太派利是前先發新年財，玩吓衞生啤牌，人哋話肖牛嘅人虎年會行大運，果然千嬅不停贏錢。
派利是時，有啲人整蠱千嬅，完再，有人更三次，千嬅惟有收埋晒啲利是然後匿埋，成班人玩到癲，千嬅仲幾乎跌倒㖭，不過佢後來都繼續派，佢話準備咗五位數字利是。千嬅一見樂仔埋嚟利是，仲祝佢快啲搵到老婆可以派利是，樂仔好無奈咁話：「我邊有你咁幸福呀，丁太！我都冇人要。」
日吸5包煙周身病
千嬅同樂仔喺《志》片入面玩姊弟戀，合作得幾愉快，劇情講佢哋成日匿喺後巷煲煙，仲煲出感情，千嬅話睇完劇本時心諗：「嘩，唔係拍我自傳呀？」樂仔反問：「劇本話我哋去過時鐘酒店喎，你又同丁生去過咩？」千嬅大笑作狀打樂仔，仲話：「你係咪食得飽得滯呀？」
平時唔食煙嘅千嬅話為部戲，日日要吸五包煙，本身有哮喘嘅佢因而周身發炎，包括中耳炎、鼻黏膜炎、喉嚨炎，睇勻中西醫。連就算係煙民嘅樂仔都話未試過拍戲要吸咁多煙，佢話：「拍戲時，我食煙食到連自己都頂唔順，收工之後一支煙都冇再食過。」