新春大吉！新年超多美食，年糕、煎堆、油角、蘿蔔糕、糖果、瓜子開心果……開懷大嚼之後難免有點膩又有點滯，不如來個清清哋的粥底火鍋，豐富又滋味！
記者：梁美甜
攝影：陳陶鈞、楊錦文
Model：Suki@PureModels
大蟹鍋過16款料
想食粥底火鍋，一定要試銅鑼灣優食橫町的煮館，就連不少大廚為解開「不燶之謎」也來拜訪，那麼巴閉？是！煮館的粥底，以五六種米混合打成粉煮成米漿，稀如水，細看卻又見米花，吃時更是打粥而非加水，令粥底更綿香濃郁。
煮館食材以中日fusion為主，至於熱賣的粥底火鍋，用料選擇30多款，主打三款二人份鍋料，有原隻大蟹鍋、肥牛海鮮鍋及日本帆立貝海鮮鍋，除主打的原隻大蟹、肥牛或日本帆立貝，每款都有齊生蝦、花甲、斑片、手打墨魚滑、手打蝦丸、走地雞、鮮肉丸等超過16款，份量多，更隨火鍋套餐送米皇鍋底及佐粥五小碟或鮮茄魚湯鍋底，每款鍋二百多元二人份量，抵吃！
最巴閉是幾十款生料大多是以海鮮、豬肉雞肉等新鮮自家製，蝦丸以鮮蝦手打而成、肉丸以新鮮豬肉打成、墨魚滑以新鮮墨魚手切後再打至起膠；料靚加上粥底綿香，煲足幾小時都不會燶，火鍋料不會滾至嚡身無味，依然軟滑汁豐。最後更不要錯過鍋底的一碗粥，如經理Joey所言，鮮甜滑溜如腐竹蛋糖水，當然無咁甜，反而帶點自然的鮮味甜美。難怪吸引一班食客不斷捧場，莫論周末，平時都不時爆場，想試最好預早幾日訂座甚至訂餸呢！
原隻大蟹鍋$288（二人份）
生料份量多又超豐富，有生蝦、花甲、手打墨魚滑、手打蝦丸、走地雞、黃沙豬膶、水晶年糕、鮮肉丸等超過16款，鍋料更送米皇鍋底及佐粥五小碟。花甲大大隻鮮甜肉厚。
一口豬軟骨特價$18（原價$38）
叫大蟹鍋可以$18試一口豬軟骨，經特別燜製後，軟骨腍而不鬆不爛，肉味鮮香，抵吃！
黃沙豬膶$32（散叫）
新鮮黃沙膶爽口嫩滑，好味到連平時不嗜豬膶的model都連吃半碟。
鮮肉丸$28（散叫）
以鮮豬肉加調味打製而成，吃得出的新鮮，肉香鮮甜汁又豐，讚！
走地雞$32（散叫）
走地雞加調味醃製，肉味鮮而濃，最神奇是下了雞而忘記了，成個鐘之後依然肉嫩好味。
米皇鍋底$58（散叫）
每日賣足兩個五呎多高的大煲粥。這個粥底，以五六種米混成，火鍋吃足四個鐘，就算連煲幾小時，粥底都不燶不，配合肉食海鮮的鮮味，粥底綿香得來，更甜到不得了。
士多啤梨雪果紅豆冰$25
似芭菲又似雪葩的特飲，足呎半高，以鮮果乳酪、果汁等打成，配蜜糖煮到起沙的日本紅豆，豆腍而香甜，超滿足！
煮館（31738193）
銅鑼灣波斯富街48號優食橫町3樓E店
$1自滾粥頭咁大魚頭
順德素來是魚米之鄉，其河鮮更是肥美肉鮮，米質素亦高。肇順名匯河鮮專門店由順德、肇慶直接入口的河鮮，就連粥底火鍋的粥底更是自家以靚大米磨製米沙，上桌時足有四両，由客人自家放落鍋滾成粥，荃灣新店二月初開張，六時後以推廣價$1個粥水鍋底，超抵！酒家主打河鮮全由國內每兩日返貨一次，每次三百多斤海鮮。必試膠質重又嫩滑的啜魚魚頭，鮮味十足又夠份量，一個成個頭咁大。酒家小炒亦出色，必試功夫菜的生炒豆漿及清水浸魚，以淡豆漿加蛋白及蝦仁帶子等炒成，滑到不得了又鮮味；以原條高要鯪魚浸熟，既無泥味亦保留肉身嫩滑魚鮮味，出色！
清水浸雨$10/両
荃灣店獨有。原條高要鯪魚，屬鹹淡水魚，約1斤12両重，約$196一條。廚房經理良哥手拿的更是超大條高要鯪，肥美肉鮮，比星斑更好吃。
啜魚頭$10/両
一條啜魚約十斤重，單是魚頭都足兩斤半，頭咁大，啜魚魚雲夠大，膠質重又滑嫩，口感豐富，平時師傅會斬切上桌的。
新鮮黃沙膶（右）$38、粥料每份$28
新鮮黃沙膶份量足，8:45pm後入座更每碟$28，抵吃！粥料有順德頭菜、菜粒、薑絲、芫荽、葱粒，吃完再飽都要放粥料泡個鮮味的粥來吃！
招牌魚腐$38
魚腐以新鮮鯪魚肉加蛋白自家手打成，味鮮，讚！
粥水鍋底推廣價$1（原價$48）
$1粥水鍋底並無將貨就價，每鍋送足四両以靚大米磨成的米沙，讓客人放落水煮粥底。
肇順名匯河鮮專門店（39108373）
荃灣大壩街4-30號荃灣廣場6樓615-620號舖
砂鍋粥底熱賣黑百葉
想吃粥底火鍋，還有灣仔的新九記。小店的雲吞麪及粥品已經賣到街知巷聞，麪爽粥綿超多街坊捧場。以超綿粥底加水及葱、果皮等炮製而成的砂鍋粥底更是不少識食之人的粥底火鍋秘點。
小店供應的火鍋料十多款，鍋底除砂鍋粥底外，亦可選皮蛋芫荽湯。生料方面全是新鮮貨，當中以特選黃油雞、新鮮牛百葉及鯇魚嘴最熱賣。以二至三斤重的新鮮黃油雞炮製，雙拼配牛肉都足有四分之一隻雞，夠晒份量；雞肉鮮甜肉味超濃，灼熟後肉汁豐腴又嫩滑，新鮮雞確實味不同，難怪日賣幾十斤。新鮮黑百葉經特別處理，灼熱即食極爽口；鯇魚嘴其實是鯇魚頭，每日新鮮由街市返貨，一客足三個魚頭都是$55，自家去街市買新鮮的還不止這個價吧！以粥灼熟後鮮甜肉厚，更能提升粥底鮮甜。謹記，小店春假至年初八明天21號，要到22號星期一才有機會食得到。
新鮮牛百葉$55
坊間不少新鮮黑百葉都只得「葉」吃，很少可以吃到整個，事關處理繁複，這裏的新鮮百葉是一早處理好的，灼熱即吃，爽口味美。
特選黃油雞拼爽滑牛肉$65
牛肉取牛冧肉稍醃，味鮮汁豐、肉軟腍；新鮮黃油雞肉鮮味濃。
新鮮鯇魚嘴$55
即魚頭，一客三個，味鮮肉厚，日日清，晚一點便無得吃！
七彩及第$55
即豬雜，一碟六款，七彩指多樣而非七款，有豬膶、豬肚、豬心、豬粉腸、豬肉丸、肉片，鮮味肉濃。
砂鍋粥底$40
以粥品的粥底打稀而成的鍋底，加果皮、葱段等製成，綿香鮮香。
新九記粥麵（28652827）
灣仔大王東街9號地下
