早輪政府公佈年底推出數碼聲音廣播服務，小藍先知道原來香港有唔少影音發燒友，鍾意透過收音機嚟聽歌。佢哋都舉腳贊成快啲有數碼聲音廣播服務，一舉踢走模擬廣播帶嚟嘅噪音。好似耳機專門店亦軒耳機音樂世界嘅老闆Mingo就玩咗收音機聽歌幾十年，佢鍾情嘅收音機竟然係大陸貨。
煲耳機首選收音機
Mingo笑笑口話，佢有六部收音機同調諧器，最鍾意一部係內地牌子叫德生嘅收音機，賣900蚊，唔單止接收力非常強勁，唔使天線都收得好清楚，更重要聽歌啲人聲好暖好舒服，「聽歌好似聽膽機咁，邊個話平嘢冇好。」Mingo話，佢最鍾意聽香港電台第4台啲古典歌，有啲歌想買都冇得賣，「用收音機聽歌比聽CD好玩嘅地方，就係唔知下一首會播乜嘢。」
Mingo話，千幾蚊嘅單獨式調諧器啲質素都唔錯，而內置調諧器嘅AV擴音機如Marantz、Denon都好多人用，「選擇調諧器、收音機等最緊要接收力強、靈敏度要高。」講到高檔調諧器，佢話加拿大嘅密林（Magnum）係表表者，可以貴到10萬蚊一部，「但係買都要了解清楚你住嘅地區接受嘅廣播訊號強或弱。如果本身住嗰區嘅接收力弱，買部密林都冇用啦。」
耳機要煲啲聲先會靚，Mingo教路話，以CD盤24小時播放煲機會好傷個磁頭，但用收音機純粹係接收器，用嚟煲耳機最好，唔會煲壞機。