海關根據民建聯投訴，上星期分別喺維園同觀塘年宵市場社民連檔口，掃走115件印有疑似民建聯黨徽嘅禮義廉T恤，放完農曆年假後，社民連正式開工，同時搵律師研究呢單畸屎，據八方了解，社民連已擬定律師信，日內就會畀封「利是」海關，要求立即「釋放」扣查嘅百幾件T恤。
指海關錯誤理解條例
海關掃場當日指懷疑「禮義廉」T恤違反《商品說明條例》，並即時取走T恤，社民連主席陶君行同八方講，該黨諮詢律師及大律師意見後，認為海關錯誤理解《商品說明條例》，扣查「禮義廉」T恤不恰當，故去信海關要求退回T恤，佢又指海關輕易接受民建聯投訴，貿然採取行動，顯然有政治目的。
「禮義廉」T恤一掃成名，家陣奇貨可居，連另一款冇被扣查嘅「民建聯最無恥」T恤都熱賣，現時一衫難求，據講有心人可能「復刻」應市。呢次反擊海關行動，由社民連秘書長季詩傑負責，佢本來係大律師，據知近日轉做律師，工作比較有趣咁話。