打份工朝不保夕，你會點回應？懂逆境自強嘅人最值小弟欣賞！打順風波無人不識，捧強隊看風駛舉目皆是，還好賭波睇波都可以鋤強扶弱，最重要盤口值博便可取。今次重心捧極有分頭兼冇乜人信嘅「窮鬼」樸茨茅夫迎史篤城讓球上盤。
快馬比赫積勇銳
世界難撈，做英超外援家都要攞收入一半嚟交稅，不過一來佢哋係超高薪一族，加上有能力者從不愁冇班落。雖說入不敷支、發窮惡嘅英國球會越嚟越多，剛過去周日就睇輕咗水晶宮喺英足盃搶錢嘅威力，貼維拉W中伏；證明球員為求有更好出路，搏得更盡；故今周重心捧另一搶錢球會：樸茨茅夫。
佢哋作客波我唔敢掂，球迷亦請留意若撥開佢哋對上連續3場聯賽作客全敗，其實戰績不太差，近兩個月主場更只曾大敗於阿仙奴腳下；上場在英足盃作客同屬南部的低兩級修咸頓我全場睇足，雖然對手班次有別，但大家留意修咸頓其實係英甲頂級，加上主場踢打吡，場波唔易踢，莊家賽前亦只開出老樸少讓平/半超高水，結果下半場一㩒掣，入4粒擊倒對手，表現亮麗。
陣中最值留意係長勇快馬比赫積，而球隊能從作客3連敗谷底回升，再獲熱刺借得中場助攻助守嘅奧哈拉有莫大關係；對手史篤城已保持9戰不敗，但周中硬撼曼城一役耗力不少，而且「賭鬼」發電機艾法寧頓缺陣影響極大，作客老樸亦從來唔掂，莊家開出包尾隊讓平/半，我信！
禮拜日，亦捧另一讓平/半球隊曼城殺低利記，主場鬥強隊從來打高兩皮波，呃到老細，球迷又高興，有賠率不會放過。
近5場往績：DWWLL
蘋果波神
簡介：一分耕耘一分收穫，難得半夜睇波娛樂兼備，人生一樂也。捧愛隊可以好主觀，但若能客觀地從足球直播欣賞對戰雙方的表現，你會發現不少投注寶藏，啟發投注靈感。