老牌名校瑪利諾修院學校棵70歲高齡異葉南洋杉「鬼樹」過唔到牛年，月前被斬開幾段運走，傷透唔少校友同學生嘅心，校友、學生悼念鬼樹活動陸續有來。反對校方斬樹嘅校友，噚日刊登一段「訃聞」悼念鬼樹，表示會喺今個月28號、元宵佳節當日為鬼樹舉行追悼會。瑪利諾噚日亦喺報章度刊登全版廣告，慶祝今年85周年校慶，兼介紹學校歷史，兩個廣告同日出街，撐鬼樹校友擺明有備而來。
今年係瑪利諾85周年校慶，又係三年一度嘅全球校友聚會，聽日會喺會展大禮堂舉行校友聚餐，可惜離開母校多年嘅舊生今次重遊學園，就唔可以再見到棵鬼樹嘞，只可以憑相片追憶鬼樹風采。而校方刊登嘅廣告內多張校園相片，鬼樹連影亦冇，好似從來冇存在過咁，反而搵咗唔少知名校友贈興，包括現任小學部校監、申訴專員公署副專員余黎青萍、自由黨主席劉健儀、「眾人媽打」前高官李麗娟等，絕對係星級陣容。
不過另一邊廂，鬼樹「訃聞」聯署名單都唔弱，除咗一直向校方據理力爭嘅校友朱茵之外，仲有衞生署助理署長程卓端同佢丈夫廖文山，呢篇「訃聞」詳細講述鬼樹被斬經過，指摘校方話鬼樹被斬後發現樹心有異味斬得啱，其實係知少少扮代表，因為經樹木專家研究同分析鬼樹殘枝後，指樹心發臭實情係樹木保護自己嘅方法，象徵鬼樹有生命力自救，絕對唔係非斬不可。
斬樹再種早有前科
校友又翻舊賬，指瑪利諾唔係第一次斬樹，以前試過喺中學部斬木棉、喺小學部大門附近斬椰子樹等等，通常斬完後會再種新樹，稱得上係斬樹老手，校友指呢次斬樹，令人見識到「人類兇殘一面」，咁唔尊重生命，質疑教壞學生，有舊生近日喺facebook開group，表示擬成立一個非牟利嘅組織悼念鬼樹兼做保育樹木工作，正公開徵集名稱，有人提議「友建樹」，亦有人建議名為「鬼樹情未了」。
mailto:[email protected]