人似乎總要經一事，才能長一智。貪戀杯中物致醉打側田的曹格，短短幾個月走過人生低谷──犯下官非、形象受損、演唱會被迫取消、甚至幾乎與好友反目。風浪過後，曹格終於的起心肝戒酒，也明白到生命的可貴：「以前覺得死就死啦，家？我唔想死住。」浪子回頭，未為晚也。 撰文：藍文浩
由去年9月23日大戰側田開始，到今年1月22日法庭宣判，曹格經歷了整整4個月的黑暗日子。當天進入法庭前與今次專訪之時，筆者問了同一個問題：「心情點？」在東區法院外的寒風下，曹格雙手合十答道：「心情OK。」時空換到完成出事後首個大型演出後的今天，他卻堅定地說：「好好，非常之好！」曹格的心情，明顯比之前輕鬆及自信得多。
自判守行為一世
曹格的「WelcometoMyWorld」亞洲巡迴演唱會，原定去年11月在香港舉行，但發生街頭醉毆側田事件後宣佈取消，直至農曆新年前夕才定於澳門再度舉行。舞台上的曹格風采依然，卻似乎較之前少了一分狂妄，多了一點謙遜。完騷後在後台接受筆者訪問，他也表現得十分感恩。
曹格完成澳門個唱後，與工作人員慶功直到快天亮，經短短數小時休息後，就坐在酒店套房的沙發上接受本報專訪，他說：「一開始其實我非常之擔心，我好早認咗錯，但係我願意承擔，我有最壞嘅打算。自己犯咗咁嚴重嘅錯，今次判刑令我更加有推動力，更加determinate（堅決）去改變我自己。今次我唔只係守行為12個月咁簡單，而係守行為一世，呢個係我判自己嘅。」
過去曹格曾多次醉酒失態，幾杯黃湯下肚，就在他與側田上演StreetFighter真人版前不久，才在台北發生爆杯見紅事件。自言經過今次官非後已完全戒酒的他說：「今次完全係我生命嘅另一個階段，係非常重要嘅成長階段。我由細到大撞過好多次板，家都30歲啦，點都好過4、50歲再犯錯，搞到家人好擔心、好傷心。家返轉頭睇，可能係上天安排一個測試，睇我改唔改。有位前輩同我講，佢話再唔改我就得番兩個字：『收工』。唔代表artist身份收工，仲係一個仔、一個兄弟同一個爸爸嘅身份，再唔改全部角色都收晒工，前輩呢句說話令我醒咗好多，好多。所以到最後嚟講，呢件事對我個人係一件好事。」
「我同側田冇嘢喎」
事件另一主角側田被曹格在港島中區技術性「擊倒」後，兩人仍然是好Buddy，曹格說：「我同側田？真係冇嘢喎，我同佢都係巨蟹座，鍾意嘅artist、音樂都好似，我同佢好夾，鍾意唔鍾意都好，講嘢都係好直。但係佢比較happygolucky，我自己就會諗好多嘢，向壞嘅方向諗，我都知positivethinking幫到我，但係我都要時間去學習、去改變同去適應。
「其實法律上喺判決之前我唔可以同佢有接觸，但係我哋做artist，頒獎禮俾人拎出嚟講，我覺得都唔係一件壞事，我哋知道自己冇事，我仲希望佢可以坐喺我旁邊，因為我同佢最熟，可以傾偈。新城頒獎當晚，我去到知道佢坐我隔籬，仲sms畀佢，佢仲話如果有人影的話會坐我大髀。到勁歌又係，我得一個獎之嘛，不過坐咗好耐，哈哈哈哈哈哈！唔好話畀陳志雲知。」
判刑後慚愧落淚
此刻笑得開懷的曹格，其實一直到法庭宣判後，才對整件事釋懷，他說：「未上庭之前我一直圍繞喺個框框入面，雖然我認咗錯，但係仍然會擔心，我都係一個人，直到離開法庭，返到酒店房，工作人員走晒，得番自己一個人，我先為呢件事喊咗出嚟。因為嗰刻睇番個過程同埋之前所有犯過嘅錯，我戥我屋企人傷心，先感覺到做我家姐、父母、老婆甚至歌迷朋友都唔係簡單嘅事。佢哋好傷心，但係都一直包容我所有好同唔好嘅嘢，我好感動，亦都好慚愧。」
作為藝人的另一半，已要承受不同於平常人的壓力，而作為壞孩子曹格的另一半，壓力更是大到平常人難以想像的地步。曹格說：「太太好大量，佢好體貼咁支持我。我知佢好辛苦，日日面對我仲辛苦，我又要成日飛，唔多時間喺屋企，佢係上天畀我非常好嘅禮物。」他頓一頓，續說：「我個仔就係嚟世上教我，佢教緊我點樣負責任、教我乜嘢係生存意義，以前覺得死就死啦，家？我唔想死住。」
「I'mnotaNiceGuy」
在澳門個唱中，曹格演繹了一曲《I'mnotaNiceGuy》，成為他以往爛蒲爛玩形象的完美註腳。對守在家中的太太、兒子和家人而言，過往的曹格也許真的說不上是niceguy，對此他說：「睇吓對邊個啦，我會諗，點解我咁moody、咁難相處都有人支持我？原來佢哋都係睇到我好嘅一面。其實我以前脾氣好差，俾人攻擊我一定會還手，家我想由負面情緒慢慢轉去開心啲，因為笑聲真係可以感染到好多人，相信我下定決心去改，大家都一定會支持我。」
今次出事，也令曹格深深明白作為一個藝人，對社會的影響力有多大，進而希望借此將「福音」傳開去，導人向善，他說：「我唔係想證明啲乜嘢，不過係想成為一個榜樣畀大家睇睇，對我自己同埋身邊人應該係好事。」他苦笑說：「我何德何能，講一句說話、上電台或者家同你做個訪問，就可能有幾百萬人聽到、睇到？我以前冇諗過，都唔知道可以影響咁多人，家我有責任去makesure自己做呢樣嘢。」
場地提供：威尼斯人度假村酒店、澳門百利宮
修心戒貪宣揚Love&Peace
眼前的曹格，絕非一個會隨意動手將好友knockdown的人，相反，他的說話甚富哲學味道，似乎是在這4個月時間中想了個通透，他說：「一個貪字可以搞出好多問題，貪玩、貪錢、虛榮，如果一個人可以乜嘢都唔要，你其實乜嘢都有，當你要求越少，其實你得到越多，但係講就容易，做就非常之難。如果每個人都去做嘅時候，世界會美好啲。」
過往貪獎貪面子
曹格續說：「我以前可以話係貪面子，所以所有嘢都係擺喺心入面。有乜嘢事都扮開心、扮冇事，其實呃人。好似去頒獎禮咁，特登一早起身set好頭整靚啲衫行星光大道，話唔想要獎係呃人，梗係想啦！呢啲咪虛榮感囉，獎代表工作人員、唱片公司同歌迷肯定同鼓勵，artist冇虛榮感就係呃你，冇點做artist呀？
「所以我家盡量去減低貪紅，希望大家睇我睇長遠嘅，唔係今年受唔受歡迎，係我寫嘅音樂可以影響其他人，將生命變好。或者借其他artist嘅聲音感染佢哋嘅歌迷朋友，好似張惠妹、蕭敬騰同王心凌咁，用音樂將love&peace呢個idea寫畀佢哋，透過佢哋咪仲多人聽到呢個message囉。」
