新年快樂！話說當年因為貓先生瞓過龍，錯過玉皇大帝高峯會，結果慘遭Out出十二生肖行列！適逢虎年，與貓系屬同門，「金句王」藍奕邦亦趁勢「出貓」給他的寶貝貓咪亮亮相。
記者：蔡俊業
部份攝影：伍慶泉
場地：阿貓地攤（銅鑼灣富明街2號寶明大廈3樓D室/27109953）
高竇貓罰你摷
阿邦家中養了兩隻貓，一隻白色毛藍眼睛的叫阿Max，是3歲美國捲耳貓，另一隻較大份，就叫Hazel，則是兩歲半的波斯貓女，「兩隻都係我阿媽買返嚟嘅！」阿邦工作越來越忙，牛年擔任《超級巨聲》評判之餘，又推出兩張EP和開MiniConcert，曝光率增加，卻犧牲了和兩隻貓的相處時間。阿邦話：「以前我一開門，阿Max就會撲過嚟，近來已經變成只會企定喺門口等我，有時甚至擺出一副『捨得返嚟喇咩?!』嘅姿態。至於Hazel，就更加只會匿埋唔出嚟，仲要匿得好入好鬼祟，要我搵佢一輪先肯出現！」
揸波波至High
唉，做「貓老竇」平日奔波勞碌為頭家，返屋企竟遭冷待，果然有苦自己知！難得新年，貴人事忙的藍奕邦亦難得有假，本是同貓貓相處重修舊好的大好時機，但阿邦為了充電及Relax一下，新春還是決定暫時飛起兩隻寶貝貓出外遊埠，幸好有一眾朋友幫手：「佢哋會上嚟我屋企同我爸爸拜年，同埋同兩隻貓玩。」講到玩，少不了玩具，但原來阿邦對於買貓玩具從來「慳家」，極少買玩具給兩隻貓，歷來玩具數目五隻手指數得晒：「費事寵壞佢哋。」少買玩具的阿邦，索性將自己變成貓玩具，「平日喺屋企有時間陪佢哋嘅話，我就會將自己變成貓玩具，服侍貓貓！」即使真的買貓玩具，也專挑一些新奇有趣的來買。「兩隻貓都好鍾意玩波，所以之前去日本旅行，買過一套類似毽嘅波畀佢哋玩，仲有網球和高爾夫球等唔同設計。」今年阿邦新春外遊，看來兩隻少收玩具的貓，也會有新玩具玩喇！
貓模試玩最愛氹氹轉
今日人日又係周末，主人基本上拜完年終有大把時間陪貓咪玩。有要求的藍奕邦雖說少買玩具，但有特色的還是會留意。所以小記特意搜羅幾款新穎貓玩具。但有幾好玩始終要問過隻貓，故邀請了「貓模」鬼仔和BB試玩。最初小記以為鹹魚青菜各有所好，豈料最後以「氹氹轉飛貓毛」強勢勝出！
隱形玩貓繩
Fling-ama-String電動鬼馬繩，詭異之處：七彩繩黏附運輸帶上，只要扭開開關，貓仔見到時隱時現的七彩繩會拍吓拍吓，相當鬼馬。$280（須訂貨）/a
氹氹轉飛貓毛
一般貓玩羽毛都固定在棒上，DaBirdFeatherTeaser貓棒則有三條羽毛氹氹轉，現場所見，Cool貓一經試玩都立即飛撲。藍奕邦想番少了相處的貓睇嚟唔難。$80/a
貓唔捉老鼠
Play-N-Squeak發聲鼠，只要貓咪用爪拍到或揩到老鼠皮膚已會吱吱叫。但老鼠唔識郁，貓模咬兩嘢就唔玩。$45/b
捕光捉影啱拍片
FroliCatBOLT貓貓自動雷射光，備自動及手動Mode，前者會自己跟隨貓蹤發出雷射光，適合愛拍片的主人們。$360/c
電動躲躲鼠
UndercoverMouse電動躲躲鼠，開機後，膠布下的電動裝置和長桿會轉動給貓仔拍打。$250（須訂貨）/b
a.流浪貓雜貨 （28366328）
b.PetMAX （21539999）
c.名門純貓店 （28341957）