與賭王何鴻燊關係千絲萬縷的前私家看護、曾被以為是五姨太的鄧詠詩（Candy），去年9月與游泳教練蘇炳龍結婚後造人成功，兩夫婦日前到中環ABathingApe掃貨，短短半粒鐘已豪氣掃走大袋猿人衫。何超瓊昨日探望父親，透露已買新羽絨給他保暖。
賭王何鴻燊前私家看護鄧詠詩與游泳教練老公蘇炳龍造人成功後，夫婦二人不時拍住拖出外大晒恩愛，繼上周五Candy偕老公到灣仔有富豪飯堂之稱的福臨門團年後，上周六兩公婆又再出動，到中環享受購物樂。
當日下午5時許，腹部隆起的Candy與老公十指緊扣在皇后大道中出現，二人走進ABathingApe後不停左揀右揀，初時Candy與老公一齊揀衫，又不停給老公意見，但為爭取時間，二人最後分頭行事，各有各睇。其間Candy除了揀女裝外，又不時幫老公揀衫，然後着老公試身，結果短短半小時，二人已掃了大袋戰利品離開。雖然Candy表現豪氣，但不論售貨員或其他顧客、途人也不認得她。
賭王打波鬆筋
Candy與老公離開店舖時，忽然下起雨來，蘇炳龍第一時間撐傘免老婆被雨淋濕，之後他孭住大袋戰利品，一邊撐傘一邊搭住老婆膊頭，往附近乘搭的士離開，表現夠晒細心體貼。
另外，何超瓊昨日到醫院探望賭王，她透露已小心為父親保暖，她說：「新年有買新衫，買咗羽絨畀佢，家房嘅暖氣都調高咗。」
超瓊謂賭王平日作息運動要視乎心情，她說：「網球係佢自己打，物理治療師幫佢執波，主要係鬆吓啲筋骨，增加靈活度。」她又指未來一兩星期，賭王暫定不會出院。
採訪、攝影：李志明、顏英儀
