陳奕迅（Eason）和容祖兒之前為爭傳媒大獎鬥生鬥死，昨日齊齊宣傳又變番老友。未嫁的祖兒風騷派利是，反而已婚的Eason見現場記者眾多，即縮沙呻窮謂不想蝕底，新正頭都不派利是，令祖兒輕易攞彩！
陳奕迅和容祖兒（Joey）昨日年初五在荃灣愉景新城出席「麥當勞35周年誌慶」，二人不久前才為爭奪樂壇頒獎禮的傳媒大獎而針鋒相對，但頒獎禮結束後又變回老友，Joey還自爆向Eason討得一封大利是。
Joey在頒獎禮上贏得傳媒大獎，昨日繼續風騷，向現場近百記者派發百元利是，相反Eason見記者人數出乎想像的多，竟臨時縮沙呻窮，輕聲說：「等Joey派啦！我表面風光，估唔到今日咁多記者，我咪好蝕，你知啦，你見我結婚都唔講都知我係乜嘢人，等我返去銀行『暢』硬幣，封利是有聲大家聽到好開心，派利是感覺係一種祝福，大家分享福氣啫。」
Joey風騷完，又顯威風說：「年初一做完北京春節晚會，返到香港機場，有30幾個fans接我機，佢哋個個都攞住我個boxset（唱片）接機，我每個fans都有派（利是），當時感覺自己好似韓國明星咁，好墟冚嘅場面。」
Eason掙爆紙褲
活動上，Joey和Eason穿上用魚柳包和豬柳蛋漢堡的包裝紙製造的服裝，與現場350名青少年一齊跳竹舞和打大鼓，合創健力士世界紀錄。Eason玩得興起，紙褲爆裂露出打底褲，Joey身穿的斜膊裙也有點破損，Eason笑說：「好大壓力，咁多鏡頭對住我，尤其係下半身，最驚有人喺我身邊點火，好彩冇事。」
採訪：魯萍
攝影：仇志德