春節假期氣氛未過，大市成交再縮，唔夠340億元，創下11個月以來新低。今日係星期五，估計股海交投氣氛都唔會太旺，不過大家唔使驚大市成交繼續縮落去，事關唔少投資者等緊下周一大陸股市重開，只要內地A股一開，形勢明朗之後，投資者就會揮軍入市，大市成交自然會升番上去。
若果散戶認為下周大陸A股將紅盤高開，可趁個市氣氛麻麻低吸心水愛股，短炒一轉獲利，不過任何預測，散戶都要自己衡量風險先好行動。
近期內地壓抑樓市力度驟降，內房股呢輪總算企穩陣腳。盛高置地（337）剛組的合營公司，以35.3億元人民幣投得無錫市濱湖區太湖新城商住地皮，面積約27.23萬平方米。
受惠消息刺激，盛高置地昨復牌逆市炒上，一度高見4.46元，收市報4.38元，升4.3%。陰陽燭圖現十字星，但10日線升破20日線利好，可趁股價回氣時於4.20元水平買入，目標睇4.80元至5元範圍，失守3.85元止蝕。
方星俠