意外嘅嘢唔會因為新正頭而暫時迴避，就算呢幾日傳媒洗腦式教大家趨吉避凶，但老利嘅嘢始終唔會嫌多，尤其今日方海閱師傅簡單一招，到文具舖買包星星貼紙、圓形掛飾，為你部車裝身，都可催財擋煞，所費十蚊八蚊，就可保你一路平安。
記者：徐影龍
攝影：楊錦文
Model：Vivian
鳴謝：玄學家方海閱（21441514）
貼紙地毯雙重催谷
經香港淳道玄學總會會長方海閱師傅詳細講解，我都變咗半個生神仙，可賣弄一下丁點催運秘技。今年「八白入中」，意指財星入中央位，對一眾車主或揸車搵食嘅司機大佬，最適宜喺車櫳中間天花頂，黐番啲尖形或星形嘅物件。嫌天花掛吊飾「條條Fing」睇到眼都花，方師傅話黐貼紙一樣得，亦毋須分大細，即係一般文具舖賣緊幾蚊一大張嘅星形貼紙仔都Work。由於「八白入中」屬土，貼紙顏色方面，最好用橙、紅或紫色，用意係以火催旺財運。
肖猴、虎、蛇、豬者今年犯太歲，可以金色飾物化解不祥災煞，最好揀番圓形物件如金葫蘆，銅錢等，細細串掛喺倒後鏡就搞掂。特別一提係肖狗人士，雖無犯太歲，但就犯白虎，要特別小心道路安全，避免發生交通意外。
香水座形狀配生肖
數車內最多人裝嘅配件，相信香水座仲多過電話座。方師傅針對12生肖，指出所屬吉利香水座形狀，新一年換新香味前，大家不妨先對號入座。
a.半圓形歐陸貴族（猴、雞）$88
極富歐陸雕刻藝術Style，跟豪華房車幾合襯。以為重甸甸，其實全塑膠製品，毋須擔心急停煞車時，會飛脫出嚟掟親人。
b.長方形淡香（蛇、馬）$39
包裝盒寫有「游泳時嘅清新感覺」，我就聞唔到海水味，不過淡淡幽香唔太濃烈，最啱對香水敏感又或討厭香精嘅人。
c.尖形唔拮手（龍、羊、狗、牛）$18
搵過先知，三角形香水座原來極罕有，全舖只得一款。雖屬三角設計，但角位偏圓唔拮手，而且$20有找，抵玩。
d.隋圓形藍天感覺（豬、鼠）$28
帶天藍色調嘅香水，金屬加透明藍樽蓋，擺落Hybrid車度可謂襯到絕。附屬嘅星形鏈仔，亦切合虎年催財條件。
e.波浪形左右逢源（虎、兔）$25
並非彎彎曲曲先叫波浪形，好似呢對冷氣口用香水插座咁，一套兩件，左右逢源兼高低起伏，一樣好意頭。
產品查詢（香水座）：PitStop（23926476）