黃百鳴間天馬電影前晚喺銅鑼灣筵開24席食開年飯，《花田囍事2010》演員古天樂、吳君如、鄭中基同李香琴都有出席，順便谷吓部戲，事關部《72家租客》贏《花田》300萬票房呀嘛！電影公司當然要落力啲，仲打咗兩個金壽桃分別送畀李香琴同夏春秋，四朵金玫瑰就送俾君如、古仔、Ronald同黃百鳴一人一朵。
未開畫都計到條數
講到票房輸俾《72家》，黃百鳴個樣有啲失落，佢話：「恭喜佢哋囉！如果我哋要做到佢哋嘅電視宣傳要成千萬o架，《花田》內地票房都好好。」佢話自己都有買飛捧《72家》場o架。
君如就寸《72家》有永明牆紙包場，好唔抵得話：「我走咗幾日啫，咁犀利？佢哋有催眠性質嘅宣傳，無數咁多嘅贊助商，無數咁多嘅牆紙，冇辦法o架！我出年搵番咁多贊助商先得。其實我聽到都幾意外，飆升得咁快，志偉話要贏300萬，真係啱數喇，未開畫都計到條數。」即係話人篤數啦？君如話：「我冇咁講冇咁諗，新正頭嗌交唔好口，兩部戲一齊收得囉。」古仔同Ronald都話最緊要係港產片收得。
Ronald提女友面紅
問Ronald會唔會包場同女友蔡卓妍睇嚟谷票房，佢話唔想抹煞其他人睇戲嘅機會，講到女友竟然面紅怕羞，問佢有冇去蔡家拜年，Ronald話：「電話拜年。」佢話情人節冇送禮，下年會整心形蘿蔔糕女友喎！