藝術節月底開鑼，其中《情話紫釵》是毛俊輝繼《新傾城之戀》後的全新劇作；還無間道式找來麥兆輝和莊文強合撰新劇本，談的是現代男女，參考的卻是50年前的《紫釵記》。Crossover背後，毛Sir說是借古諷今，唐代一簪紫玉燕釵穿梭時空成寓言來個現代愛的教育。
記者：蔡俊業
攝影：陳陶鈞、陳盛臣
毛=毛俊輝
麥=麥兆輝
莊=莊文強
記=記者
劇壇「教」父吹雞
記：拍慣電影，今次踩過舞台劇的界，說說你們和毛Sir合作源起。
麥：我是毛俊輝學生，1986年入演藝就係佢教，教足4年，係我戲劇上嘅啟蒙老師。前年聽到佢話唔做（香港話劇團藝術總監），成班學生都好關心，初初都懷疑係唔係做西九嘅CEO，點知上年年中，佢話想搵我哋寫個舞台劇劇本。佢叫我，我實做。
莊：前一年我哋畀《竊聽風雲》劇本佢睇，原本想搵佢做戲，但佢體能上支持唔到。反而因為佢睇完個劇本，覺得呢兩條友好似寫到嘢，就搵我哋傾。
毛：當你要創作一個新嘅作品時，就特別好玩，因為原創啦，又有麥兆輝同莊文強同我一齊做文本創作。
記：但聽講古仔俾毛SirBan咗好多次？
莊：因為佢無講要乜，淨係畀咗唐滌生個劇本我。第一次我就帶咗三個古仔畀佢，過程中我講咗好多自己對愛情嘅睇法、朋友嘅愛情經歷，講吓講吓佢就話我係要呢啲，唔係要你個古仔。
麥：你講嗰啲朋友唔係我吓嘛？
莊：係我啲女性朋友一路長大過嚟，對感情認識嘅轉變。覺得好多嘢都現實咗，以前叫理想，家叫幻想或者叫妄想，作為一個現代人要點樣去適應？好簡單，今時今日，你向身邊那人要求至死不渝，係唔係會發生呢？係唔係將會發生呢？毛Sir覺得我可以完全將性同愛，又或金錢與愛情完全分開，現代人往往將物質同感情溝埋咗，從前最Classic嘅愛情亦溝淡咗。
劇本現在進行中……
記：你們二人如何分工？
麥：劇本主要由莊文強寫，因為兩個Media唔同，佢習慣寫電影，一路寫會一路分呢個係WideShot，嗰個係CloseUp，同舞台劇分別太大，舞台劇就係一個框，你個位係第四行就係第四行，係第四十行就係第四十行，無CameraMovement，無放大收細。咁要點樣先可以幫到呢件事呢？
莊：我自己寫完，睇番都覺得好譖氣，因為寫咗好多Monologue（日常生活的獨白）。
麥：舞台劇係好表現性質，電影就用CloseUp或者VO去表達，如果撈埋之後會有少少危險，但毛Sir話無問題，我都好想睇吓出嚟嘅效果會係點。
莊：有場戲講一男一女，我寫咗個好崩潰、好激動嘅位，但毛Sir刪晒，佢話：「一表達出嚟就唔係我要嘅嘢」。之後我將內容越來越淡化，當然，語言上會拮吓人，但唔係攞把刀出嚟拮人嗰種。SoFar個劇本已經係第三個版本。
記：那劇本落實了嗎？
毛：未呀。因為新劇本中，莊文強只係負責一部份，仲有一部份要排戲嗰陣先可以Develop出嚟，並唔係一個完整劇本。家劇本仲進行緊，我仲喺度改緊。好多時未做過嘅原創劇，一排嘅時候，尤其係有經驗嘅演員同導演Work嘅時候，就會發覺，呀，原來嗰度要答呢個問題，答咗個問題後就要改。
現代紫釵愛的教育
記：強調原創，靈感何來？
毛：兩年前我睇到一本書《愛的藝術》，作者係一位美國精神學家佛洛姆（E.Fromm），佢入面講咗樣嘢好正，提到現代愛情，好多時已變成日常物質社會嘅交易，包括值唔值呀、可以贏幾多呀、會唔會輸呀……但愛情其實係好心靈上嘅東西。而且好多人只係想被愛，但要你愛人呢？又無好好諗過。原來愛人，係一種學問，係一種藝術。
記：承接強調原創跟不斷改動劇本，那何以偏挑老舊的《紫釵記》？
毛：E.Fromm提醒咗我，喺經典戲曲入面，好多時我哋睇到真正嘅愛情故事。今日睇番，我哋會覺得那些「才子佳人」嘅故事好儍好Naive，例如霍小玉，佢愛李益愛到死都唔怕，好有力量。點解當時已經有呢類故事出現？其實嗰陣已經想教我哋點樣去愛。只係形式上停留喺某個階段，觀眾先會覺得婆婆媽媽，所以我哋要作一個現代版霍小玉同李益。又因為故事標榜本地原創，所以揀唐滌生。
記：那劇本共有多少種元素？
毛：有三種元素：有戲曲，但又唔係完全做戲曲，而係戲曲嘅「唱情」表演。另一部份係現代古仔，謝君豪、何超儀負責主要愛情故事，並由莊文強負責寫劇本。仲有一班人「現代男女」討論呢個戲，有啲似一套戲入面嘅說書人，代表睇戲嘅人。幾個組合加起嚟，仲要有個音樂劇場嘅元素，你話複唔複雜？
記：複雜，絕對複雜。一眾現代男女在解讀唐滌生的《紫釵記》，一邊又有古典跟現代版李益霍小玉。還是易了容的摩登版落差更大戲劇效果更強吧？
毛：何超儀和謝君豪可以講係現代版霍小玉和李益，我以《紫釵記》作引子，反射現代世界都有對咁嘅Lover，當然佢哋嘅關係好唔同，佢哋係現代社會中我哋好熟悉嘅一對Typical年輕人，佢哋面對嘅愛情同舊傳統講嗰種較單純嘅浪漫愛情嚟得複雜同現實，用呢種方法反映現代愛情價值觀，呢樣嘢係我成套戲入面最想探討。
綵排率先睇
《情話紫釵》
日期：3月4至9日（8pm）3月6日（3pm）
地點：香港演藝學院歌劇院
網址： http://www.hk.artsfestival.org/tc/prog/11/
唐滌生
讀了一篇那麼長的訪問，講了那麼多次《紫釵記》，怎能夠不說唐滌生？唐滌生，廣東中山人，1937年日軍侵華，輾轉流落香港，加入名伶薛覺先領導的「覺先聲劇團」負責抄曲，稍後轉為編劇。不久他便完成首部粵劇作品《江城解語花》，由白雪仙之父白駒榮主演，自此展開其編劇生涯，先後編寫了《紫釵記》、《牡丹亭驚夢》、《蝶影紅梨記》、《帝女花》等著名劇目。
後記：上腦
自問對粵劇認識有限，於是訪問開始便跟毛Sir「約法三章」，希望他見諒。離開餐廳，跟他去到租用工廠大廈的排練場地，我看他們唱《愛多幾哩》看得入神，忽爾毛Sir走過來與我促膝而坐，又徐徐翻開一本厚甸甸的文件，用手指在紙上搜尋，找到了：「《紫釵記》我最愛這段，真係好唐滌生風格！」他不講，他唱：「我典珠賣釵，以身待君，我盼君望君，醉君夢君，你到今竟再婚折害儂。」唱到第二句時，我居然能跟着唱，唱畢，毛Sir望望我，然後大力拍我膊頭，「你識嘅！」請相信我真的不懂，大概是受父親薰陶，以及《歡樂滿東華》的影響，上了腦也不自知。
