新年期間好多人都鍾意打吓麻雀仔，前政務司司長陳方安生一向喜歡攻打四方城，農曆年自然係露兩手嘅大好機會，不過佢似乎收穫麻麻，因為佢贏一日輸番兩日，但由於銀碼唔大，加上都係同奶奶打兩鋪，所以就算輸錢都仲係四萬咁口。佢噚日仲話，自己一向打開上海牌，貪呢種牌花臣較多冇咁悶。
陳太都好關心華叔病情，新年前特別向華叔送上一盆蘭花，祝佢身體健康。蘭花係「花中君子」，陳太揀花時都相當有心思。陳太稍後就會廣邀好友參加元宵嘅70大壽生日派對，好多政界名人都會出席，但據聞煲呔已經覆咗話因事未能出席，唔知係咪唔想畀陳太當面話佢爭取普選不力呢？