夠Car事：10分鐘開壇　玩具變真車

夠Car事：10分鐘開壇　玩具變真車

虎年有乜願望？我只望有工開，做車版嘅繼續揸盡天下名車。一位小學老師，閒時鍾意擺陣Set燈影玩具車，練吓摸吓，學成一身以假亂真技術，只靠一支竹、幾塊膠板，開壇唔夠10分鐘，玩具鐵車仔居然影到似原廠新車廣告。實現夢想，唔係一味靠求神拜佛嘅。

記者：徐影龍
攝影：王文忠
Model：Suki、Paris@PureModels

像真度90%
■極似真車，只欠戰神招牌尾燈唔識着。

像真度95%
■C63AMG反光位幾近無瑕，呃倒人。

平時八卦上網亂逛，偶然見到小學教師Circle嘅網誌，入面一堆靚女沙龍，呢類相本來互聯網上如恒河沙數，無乜大不了，望到其中一Part名車靚相，做得車版記者梗要Click埋入去睇吓。相簿內最多係BenzC63AMG、Porsche911、NissanGT-R同法拉利F2009，有晒全車HighLight同倒影，似足官方原廠廣告相，Click到落底先知全部係玩具！
後尾同Circle做「家訪」，秘密武器原來係個「迷你Studio」；兩張摺凳墊起幾塊反光膠板，加張黑色畫紙同深色膠板做倒影，擺陣過程相當熟練，10分鐘唔使已可㩒相機影相，最後抄落電腦，用《Photoshop》執兩執，一張以假亂真、似足廣告硬照靚相就完成。

1. Circle話未來會自組鋁架，製作更易裝拆嘅「迷你」Studio。

2. 除咗落燈同倒影技巧，Circle都花咗好多時間研究電腦執相。

3. 將唔同光源相片重叠，再用Tools「擦膠」逐條Highlight執出嚟。

同老死一齊玩

Circle話影玩具佈局靈感嚟自真車拍攝，由反光位、落燈角度，都係將真車拍攝迷你化。「參考過好多車廠拍攝嘅資料，基本上玩具都係咁影，縮細後閃燈仔都夠用，雖然只得兩支SB-800，但可就住唔同角度諗Lighting，最後用電腦組合所有光源。中間試過、亦失敗過好多次，到目前先算有啲滿意。」老實講，我做記者12年，覺得Circle由拍攝到執相，都唔係咩高難度技術，不過勝在心機搭夠。「係呀，因為我同識咗8年嘅老死Samuel，都好鍾意影相同玩具車，經常一齊研究點樣影得靚啲。我連珍藏玩具都擺晒喺佢度，唔係我無位擺，不過放埋一齊開心好多嘛。」望吓Samuel家中一角，擺晒二人心愛珍藏，每架初版都賣過千蚊，真係恍如一個小型CarShow。

作者網誌： http://www.pbase.com/circle

■Circle好多模型車都擺喺老死Samuel度，大廳一角儼如玩具車展。

■1:12保時捷GT係首架拍攝實驗模型，特別有紀念價值。（約$2,300）

■1:18BenzSLR精緻到連座椅都用真皮做。（約$1,300）

真車一樣影出Mood味

攝影其實都幾講天份，既然Circle能將玩具車影到似真車，腦中升起不如索性畀架真車佢影嘅念頭，不論效果如何，衝擊吓我哋《夠Car事》嘅影車靈感都好吖。

■Circle唔似一般龍友咁只顧影靚女，擒高踎低務求令汽車同樣突出。

■富士S5Pro配搭17-55mm鏡，將Lotus玲瓏曲線表露無遺。

■兩支閃燈一塊反光板三人小組，Circle仍嫌閃燈唔夠，超認真。

車輛提供：RichburgLotus（28770810）