虎年紅盤高開，但仲要等放完假成交配合埋，先能夠確認大市脫險。昨日美金稍回，石油、金、煤炭等板塊全部翻生，配合埋巴克萊業績勝預期大升逾倍，連3月出業績嘅大笨象都開Turbo，人人紛紛轉睇好，睇怕大摩支魔笛都要鳴金收兵。記得2月9日，全港各傳媒報道大摩對港交所（388）嘅30日大預言，當時話有70至80%機會下跌，其後股價真聽話見頂回落，30日嘅復活期將至，唔通又係挾升市先兆？
點都好，中國傳統智慧有開門七件事，家吓炒股都有開市四件事。第一，開市前請先開個美滙指數望望，跌到上升軌底部就要小心大彈，約喺79至79.5點。第二要睇吓內地網站同股市，發掘是日精選炒作亮點，留意A同H股聯動嘅股份。第三係睇埋輪商推介，唔多唔少有個市場觸覺，邊啲係即市熱炒股。第四就要開個5分鐘期指圖睇實，因為每逢市況逆轉，期指都會先現手影。
揀真正服裝增長股
有玄學家話大市要調整到4至6月先會入市，若真係如佢「預言」頂位係兩萬、低位萬八，咁港股就見咗頂喇，你估會唔會只跌兩千點咁少吖嗱。
有人鍾意服裝股，大力唱好體育用品股，李寧（2331）30倍PE、安踏體育（2020）25倍，最平嘅特步國際（1368）都16倍，全部技術走勢走晒樣，且留意24日安踏出業績，係咪支持到咁高嘅PE。買服裝股，不如睇真係做衫嘅紡織股，好似UNIQLO嘅獨家生產商申洲國際（2313），甚至係做Bra嘅安莉芳（1388）、代理adidas等名牌嘅達芙妮（210）等，走勢都好樣過蟹貨纍纍嘅體育股。
紡織股有運行，特別係FastFashion領域。你睇日本名牌山本耀司都要申請破產，LV同愛馬仕喺日本人眼中已唔再係潮流指標，人人反璞歸真，所以UNIQLO季季業績報捷，正以超過三成嘅複式增長，舊年海嘯中依然可以發盈喜，就知咩至係真正嘅服裝增長股。
胡孟青