民建聯陳鑑林上個月喺立法會大會期間唔跟大隊杯葛離場，反而獨自留守會議廳㩒掣要求點人數，好多人事後「讚」佢勇敢肯做烈士，唔怕揹上流會罪名都要阻止公民黨同社民連發表辭職演說，但陳鑑林噚日就講出真相，話自己係被個黨「欽點」至真，黨團傾完就叫佢擔大旗，自己覺得冇乜所謂咪一口應承囉。
事後睇番佢話無悔呢個決定，仲聲稱好多街坊讚佢勁，代表市民出咗啖氣喎。最唔高興嘅可能係立法會主席曾鈺成，因為曾主席完全唔知道黨友會有啲咁嘅「壯舉」，陳鑑林都話見到曾鈺成面黑黑，聽得出佢好勞氣，但事後冇向主席「賠罪」，唔通係驚主席當面訓斥？