虎年剛到，八方就聽到一個令人O嘴嘅政壇「故事」，話說自由黨等建制派雖然縮沙唔去馬參加補選，但連日來都盛傳阿爺想搵人攪局，八方近日聽到一個意想不到嘅名字，竟然係譚香文。
有人試探出選意向
譚香文05年拒絕畀票煲呔嘅政改方案，曾被譽為新民主女神，可惜佢同公民黨因了解而分手，落選後冇乜大動作，不過八方收到消息，指有啲掛住民主派「形象」嘅選委，近日突然接觸譚香文，打探佢有冇出選意欲，有人甚至以激將法，「建議」佢出選港島區挑戰陳淑莊。
八方向譚香文查證，佢唔否認有人曾試探佢嘅出選意向，不過佢強調絕對無意參選，又質疑接觸佢嘅人，只係想利用佢營造泛民不團結氣氛，佢個人對補選公投樂觀其成，「雖然我退咗黨，但點都唔會做啲搞破壞嘅事。」