【虎年賀歲盃足球賽】寒風吹走賀歲球迷！昨晚在香港大球場上演的虎年賀歲盃，由浦項制鐵、傑志及飛馬邀請隊上演「三角賽」，可惜在約攝氏10度的低溫下，只有不足5,000名球迷入場，創賀歲盃移師到大球場舉行後的入場人數新低。最終浦項制鐵以較佳得失球，力壓傑志贏得賀歲盃。記者：曾雁平/鄧永賢 攝影：王子俊
昨晚寒風陣陣，加上不時灑下微雨，令這項一年一度的賀歲盛事，只能吸引4,922名球迷入場，場面如天氣般冷清。幸好出戰這項賀歲三角賽的球隊，包括浦項制鐵、傑志及飛馬邀請隊的表現絕不欺場，以行動來報答冒冷雨入場的球迷。
飛馬連輸兩場包尾
頭場先由兩支本地球隊傑志與飛馬邀請隊對碰，前者開賽3分鐘，便由剛從大中重返傑志的尼日利亞前鋒阿歷士，壓過飛馬的南華借將中堅沙域臣單刀射入，令有施拉迪斯及艾蘭沙保助陣的傑志領先1:0。
飛馬失守後狂攻傑志，只是由史高斯、里奧及馬里奧等策動的埋門，不是沒有威脅，便是被傑志門將奧利所救，結果傑志憑一球小勝，先取3分。
緊接飛馬邀請隊迎戰亞冠盃盟主浦項制鐵，縱使此戰是浦項準備新球季的首場正式賽事，但球隊整體實力明顯在飛馬之上，加上踢法極具壓迫性，令飛馬邀請隊開賽初段大失方寸，3分鐘已被浦項制鐵的巴西前鋒阿歷山杜頭槌建功。飛馬邀請隊在25分鐘憑伊達美妙罰球追成1:1；可惜6分鐘後，飛馬防線另一次嚴重失誤，被無人看管的阿歷山杜頂成2:1。飛馬兩戰全敗，提早宣佈包尾。
伍健：料蝕少過30萬
之後由傑志對浦項制鐵的決勝戰，兩隊初段互有攻守，之後傑志在30分鐘，憑助攻的中堅羅沙度近門頂入先開紀錄；滿以為冠軍在望，豈料3分鐘後被浦項制鐵的金源一近門頂成1:1。45分鐘比賽打完，浦項與傑志同得1勝1和，前者卒以較佳得球險勝捧盃，並贏得20,000美元獎金，而傑志前鋒阿歷士，則獲選為賽事最佳球員。
傑志總領隊伍健賽後表示，從足球角度來看，今次辦了一個相當成功的表演賽，3支球隊亦合演3場精采的比賽：「今次籌組賽事時間不足，天氣持續寒冷又有雨，令賽事失收。初步估計在贊助支持下，料虧蝕不會多於30萬元。日後如再搞賀歲賽，一定要更多時間去準備。」本報訊
近5屆賀歲盃入場人數
2010年
參賽球隊：浦項制鐵、傑志、飛馬邀請隊
總入場人數：4,922人
2009年
參賽球隊：南飛聯、布拉格斯拉維亞、水原藍翼、港聯
總入場人數：18,364人
2008年
參賽球隊：港聯、夏德、彭拿路、蔚山現代
總入場人數：21,654人
2007年
參賽球隊：中國、牙買加、澳洲奧運隊、港聯
總入場人數：28,197人
2006年
參賽球隊：南韓、丹麥、克羅地亞、香港
總入場人數：30,452人
註：今屆賽事為單日的三角賽，其餘則為兩日賽事
資料來源：《蘋果》資料室
球迷反應
我哋因為買飛有折先入場睇，否則應該都唔會入場睇。雖然今次入場都比預期好，但最好都係初一同初四兩日制嘅傳統賀歲盃好啲啦。
睇咗10幾年賀歲盃，睇慣係初一同初四踢兩日，初一冇波踢氣氛真係差啲。三角賽都幾新鮮，但講到尾當然係舊制好啲啦！
第一次睇賀歲盃，皆因今次入場係阿囡嘅朋友梁倬軒有份幫飛馬比賽。如果唔係，平時都會睇電視直播嘅，今年冇直播就失色咗。
《花絮》
【球迷想睇陳七要等等】
南華今年唔使踢賀歲盃，噚日喺港大復操，準備周六作客小西灣對公民場聯賽；因傷喺東錦賽做觀眾嘅「陳七」陳肇麒（小圖），噚日繼續缺練。據聞呢位人氣球星要休息一段時間，月尾嘅亞協盃都未必打得；不過教練金判坤就話要睇埋今朝晨操，先知「陳七」係咪繼續要養傷。
【關注愛滋紅海一片】
傑志為響應車路士球星杜奧巴發起、一個名為「red」嘅關注非洲愛滋病運動，喺噚日嘅賀歲波，除咗龍門改用紅色網，一班傑志球員亦着上紅色外套進場，現場亦有張好大型嘅紅旗宣傳呢個活動。據講部份球員連鞋帶都換埋紅色，實行撐到底咁話。
【港女扮韓僑為份工】
浦項制鐵再度訪港，吸引唔少南韓僑民入場捧場；其中近10個女球迷更加着埋浦項件紅黑橫間波衫撐場，連頭場浦項U11都有打氣。睇真啲，原來佢哋大部份都係「港女」；當問到點解要着浦項波衫，原來佢哋係浦項制鐵香港分公司嘅職員，母公司球隊來港，梗要入場支持啦！
