一年一度農曆新年開市儀式噚日舉行，兩位新面孔主持儀式都腳頭好，金、股兩市雙雙紅盤高收，為今年打好基礎，可謂可喜可賀。好似金銀業貿易場咁，除咗理事長主持大局之外，年年開市儀式都有財金官員撐場，今年係貿易場一百周年，撐場嘅高官係署理財經事務及庫務局局長梁鳳儀，屬少數主持開市嘅女高官，理事長李德麟仲同記者話：「梁鳳儀係首位到場主持開市儀式嘅女高官。」不過華華記得，現任財庫局秘書長區璟智，早喺02年出任財經事務局副局長時，就已經主持過貿易場開市儀式，可能李理事長噚日太過開心而記唔起啩。
另一邊廂嘅港交所（388），雖然上星期五內地宣佈上調存款準備金率，但虎年首個交易日仍然紅盤高開，新任行政總裁李小加話：「非常高興，今年應該是開門紅吧！」佢仲首次向經紀及傳媒大派利是。主席夏佳理亦心情靚靚，皆因港股舊年表現出色，佢如數家珍咁重溫去年嘅輝煌成績，包括港交所成為全球新股集資金額最大市場，港股亦由去年初低位14480點升至年底嘅21872點。
李華華
mailto:[email protected]