新正頭，八方休息幾日，四出拜年、逗利是、食年糕之餘，亦不忘繼續收料。虎年政界社交圈準備迎接嘅第一件盛事，就係正月十五元宵嗰日，將會有個超級生日派對──前政務司司長陳方安生、方寧生一對孖生姊妹，會同埋前行政局首席議員鄧蓮如男爵一齊慶祝70歲大壽。
八方聽聞，呢場世紀壽宴今個月28號星期日喺灣仔君悅酒店舉行，大約會請百幾名賓客，包括曾經同陳太、鄧男爵喺政府、行政局共事嘅同僚；煲呔如果有時間，都好有可能到賀。據知陳太已通知親友，當日人到就得，唔使禮到，有心嘅話，最好折現捐款畀由佢同社聯、香港盲人輔導會推出嘅「長者之光」計劃，資助有經濟困難長者做白內障手術。
三人十分老友
陳太兩姊妹生日係1月17號，由於早已同鄧蓮如講好，今年三個人要一齊慶祝70大壽，而鄧蓮如生日係2月29號，所以夾好今個月28號擺大壽。鄧蓮如同陳太兩姊妹都十分好朋友，多年前一齊學跳社交舞，長居英國嘅鄧蓮如返港嘅話，三人都會敍舊。
三位女士都係屬龍，玄學家麥玲玲話，屬龍嘅人通常都幾有威勢同權力，而1940年出生嘅龍女喺虎年除咗關節方面有啲小毛病之外，其他方面都冇乜問題，而且有象徵權力嘅國印星照住，應該可以發揮一定影響力咁話。至於做大壽，所謂「男做齊頭，女做出一」，即係虛齡71嘅女士做都好啱數，尤其係丈夫健在、有兒有女者做更佳。
陳太今日開工
今年農曆年，陳太其實都好忙碌，事關要為政改諮詢做「功課」，今日年初五佢已經開工，宣佈民間策發會政改方案建議，順道同市民拜年。
mailto:[email protected]
