早前有外國旅遊網站選出世界10大核突食物，台灣豬血糕榮登榜首，我敢說評選的九成是大驚小怪的美國人！英國人早餐不就是很愛吃bloodsausage麼？材料咪一樣係豬血和穀類。工作需要，早已習慣將騎呢食物放入口，偶有發現美食，好似廈門土笋凍鮮味如象拔蚌，驢肉餃子唔羶唔臭仲有股很吸引的香味。但要選最嘔心最反胃，繼鴨仔蛋焗禾蟲和味龍之後，都要數北京地道的豆汁。由除澱粉後的綠豆發酵而成的豆汁，顏色灰灰白白似裝修用的灰水……那陣酸餿味晨早聞到確實醒神！問的士叔叔究竟有乜咁好飲，他擺出一個「估你唔到喎！」的興奮表情，似是找到同道中人咁，「喝了就是爽，我一次要喝兩碗！」然後生意都唔做，帶我去老字號老磁器口豆汁店飲豆汁。我條脷輕輕一掂那碗豆汁，已有反胃衝動，呷一啖，發覺那是嘔吐物的味道……叔叔還要配醬菜和脆卜卜焦圈，和一碗杰撻撻有麻油味又鹹又油的面茶，才算是北京人地道的食法喎。最終我剩低兩碗一啡一灰原封不動。算我挑戰失敗，唔好意思，走先！
記者：吳允冲
老磁器口豆汁店
地址：北京崇文區天壇北門對面