獅子行同喺中環總行隔籬間渣打，可謂銀行界兩盞明燈，相信同兩間發鈔行公關推廣功夫耍家不無關係。據中環友講，主管渣打全球各地區市場公共事務嘅CindyTang，好快會蟬過別枝到滙豐。
在渣打工作已約十載
據講渣打內部已發電郵，話Cindy辭咗職，市場估計伊人冇幾耐就會過檔獅子行，接替年底榮休嘅滙豐亞太區企業傳訊主管賀迪文（DavidHall）。日後Cindy相信會向滙控（005）企業傳訊主管RichardBeck滙報，區域層面就滙報畀亞太區行政總裁王冬勝。
台灣出生嘅Cindy，聽聞年幼已升學美國，雖然係華人，實情英文先係母語，銀行公關生涯亦由寶島開始，約十年前加盟渣打後負責台灣公共事務，被派駐過中東、倫敦等地，現駐紮本港。
榮休嘅賀迪文無獨有偶早年亦係出身渣打。佢加入獅子行超過十年，見證住香港最艱難同谷底反彈嘅光明歲月，由亞洲金融風暴、沙士、世紀海嘯到歷史性供股，同滙豐經歷甜酸苦辣。聽聞佢本來舊年退休嘆世界，點知金融海嘯驚魂未定，當時滙豐亞太行政總裁霍嘉治力加挽留，賀生亦以大局為重，捱義氣延遲退休，家搵到合適接班人先至交棒。