虎年最大願望係乜嘢？梗係炒股獲利，仲要身體健康，祝廣大股友們虎年大吉大利！
外圍股市呢幾日照開，但大陸股市要到大年初九，即係下周一至開市。春節長假前內地又再調高存款準備金率，有關影響將在今日港股反映，如果無持貨過年者，可以睇多陣至入市。
華能國電（902）最近傳出母公司計劃分拆風電業務上市，據講已委任數家外資大行籌備相關事宜，預料集資額達到15億美元。按照內地有關風電發展規劃，預期到2020年風電裝機容量達到10萬兆瓦，原先目標只係3萬兆瓦，但由於風電市場預測高速增長，當局遂將目標修訂，反映風電項目大有可為。據目前資料，現時內地最大風電商係龍源電力（916），華能集團則排第三。
華能牛年股價表現唔算標青，惟受惠母公司計劃分拆業務上市刺激，表現漸見轉強，10日線已升破20日線及50日線，料升勢未完，上周五收4.73元，跌0.83%，可吼位買入，首站目標5.50元。
方星俠