買新車有時都好煩惱，究竟揀趕絕外母型嘅跑車，定係做住家男人揀架七人車，煩完車款又要諗顏色……咁煩，不如交畀個天決定。玄學家周漢明就話，十二生肖各自有性格特質，買車夾埋生肖運程同五行，隨時可以幫你增強運勢，等你今年虎虎生威。
記者：趙慧敏
今年係虎年，梗係將佢放喺頭位。屬虎嘅人屬木，適合駕駛黃色又或者黑色嘅車，不過老虎仔脾氣一向較為衝動及暴躁，今年犯本命太歲，容易發生意外同有血光之災，如果揸跑車，好容易沉唔住氣同人鬥車，又或者會開快車，所以千祈唔好揀紅色，咁會加強老虎仔嘅火氣，容易發生意外。由於馬性格溫馴，如果搵同馬有關嘅牌子或車款，可以減少老虎仔嘅火氣，咁講法，寶馬自然係首選。
兔
溫馴要霸氣
兔屬木，揀白色或灰色車會較有利。兔仔性格乖巧溫馴，要佢開快車唔使旨意，一般車仔足夠有餘，不過揀架跑車就可以令你火氣猛啲，正所謂唔打得都嚇得嘛。保時捷911Turbo夠靈活，最啱兔仔兔女。
龍
夠氣勢揸名車
龍屬土，藍色或黑色車都適合，龍仔運程一般變化較大，而且頗有大佬格，好逞強，最啱揸名車。不過龍仔始終鍾意挑戰及冒險，加上今年虎年，龍虎相爭，揸車都係忍讓啲好。龍仔夠氣勢，揀Bentley，襯得起。
蛇
懶蛇要豪嘆
蛇屬火，配上木嘅顏色會帶旺蛇仔蛇女，可考慮綠、黃等色。不過所謂大懶蛇，蛇仔揸車比較滋油淡定，內櫳設計舒適最緊要，性能反屬其次。屬蛇嘅人今年刑太歲，雖然影響唔係咁大，但穩陣啲好。Lexus豪華舒適，啱晒大懶蛇。
馬
粉色下火唔怕姣
所謂老馬有火，馬亦屬火，屬馬嘅人性格急躁，揀車時最好選擇柔和色系，粉色就能改善不安情緒。大馬力跑車最好避之則吉。
羊
猛獸旺羔羊
羊屬土，所謂馴如羔羊，羊仔揸車唔亂嚟，十分禮讓。不過就易俾人蝦，所以最好搵架嚇得吓人嘅車，好似Jaguar，車頭嘅豹都可以旺吓羊仔。至於顏色，最好係香檳金或者白色，紅色係大忌。
猴
七人車啱合群性格
屬猴嘅人今年冲太歲，萬事小心。百厭猴仔揸車時鍾意唧嚟唧去，易生意外。搵流線型車款又或者七人車較適合，猴子鍾意聯群結隊活動，Stream都揀得過。顏色方面，綠或紅都OK。
雞
搶眼盒仔車襯鐵嘴雞
愛出風頭嘅雞仔雞女揸車時都係我行我素，想開快車時真係理得你邊個喺架車度。揀盒仔車又或者起角嘅車會好啲，因為襯晒個雞啄，揸起車嚟都順手啲o架！至於車身顏色，綠色係唔錯嘅選擇，呢部青Bb，至襯。
狗
大車撐場
狗本身屬土，揀黃、白或者金色都OK。屬狗嘅人揸車時都算守規矩，如果想增強氣勢，不妨揀啲大架啲嘅車，黃色Fairlady夠晒撐。
豬
技術型玩難度
屬豬嘅人今年破太歲，最好搵金色銀色旺吓！不過屬豬嘅車主一向屬技術型，鍾意向高難度挑戰，攀山越嶺嘅四驅車又或者棍波車就最啱佢，推介豐田Prado。
鼠
膽小要黑車定驚
老鼠細膽，屬鼠嘅人揸車都零舍驚青，揀架黑色車有助你定吓驚。最好揀啲流線型嘅，起晒角嘅車就唔好諗，免得唔覺意親自己。流線型十足嘅保時捷Panamera，都可以幫老鼠仔壯吓膽。
牛
忌紅色辣跑
屬牛嘅人火氣較猛，揀車就避免大馬力跑車喇，房車型最啱，都係斯文啲好。顏色方面無乜所謂，不過就唔好揀紅色，你都見過鬥牛時塊布係乜嘢顏色啦，喺馬路亂衝亂撞就唔係幾好喇！
牌子都有屬性
「五行欠打」當然係講笑，不過師傅話，每個人五行都有啲欠缺，而車都可以根據其品牌名稱及標誌有其所屬五行，咁大家不妨夾一夾，揀番同自己生肖屬性相符嘅牌子，咁就運勢更強啦！
