監管者同被監管對象，其實都可以friend到夾band，好似舊年底退休嘅金管局前副總裁蔡耀君（YK），原來同另外兩名已退休嘅賓架──蘇格蘭皇家銀行集團（RBS）前亞太區總裁袁鯤濤，同埋中銀香港（2388）前副總裁李永鴻老友鬼鬼，三人最近喺柴灣夾份開咗間商業登記公司。不過，呢家公司其實冇乜業務，屬玩票性質嘅銀杏館，即係退休一族落腳點兼波友吹水站。
夥李永鴻等 閒來聚首
金管局高層榮休後，按理最少要有半年冷河期先至可以復出，不過對監管條例滾瓜爛熟、處事一向審慎守法嘅YK，並唔係轉入市場搵食。據了解，三位金融界猛人整咗個退休竇口，純粹方便閒來聚首，間寶號並冇攞證監會投資顧問嗰類牌照，亦唔打算攞，至少家冇打算做金融服務顧問或研究機構。
講番股東之一嘅袁鯤濤，佢今年初正式榮休，聽炒房前輩講，此君乃資深財資界高手，喺外滙市場嘅崢嶸歲月，佢同前財爺梁錦松、黃鋼城、黃逸思等輩猛人，都係市場頂尖才俊。
李華華
mailto:[email protected]