踏入虎年，先祝大家投資得心應手，虎年發大財！中央趕喺過年前加存款準備金率50點子，抽走市場3000億元（人民幣．下同）資金，約佔1月新增貸款1.39萬億元嘅22%，都咪話唔重手。虎年第一擊已經咁狠，睇怕如狼似虎嘅退市部署將陸續有來。
話實恒指喺牛年升咗六成有多，表現算交足功課，部份個股更升成5、6倍之多。不過，投資者都傾向「忘記過去，努力望前」，認為市況仍將牛氣冲天；即使市況下調，大行仍係睇24000至25000咁上下；坊間「股評人」樂觀啲，睇兩萬六。若然係真，即係個市距離家有最多28%嘅升幅，特別係個別二三線股，將會有倍數計嘅升幅。歷史數據顯示，每逢央行開始加息，股市只會短暫調整，之後總係穩步向好。
加息前要跌一輪
因此，大摩估4月人行第一次加息，市況冇運行，要到6月先會好啲，預計全年新興市場最少升兩成。投資者要留意幾點︰第一，大行估計全年升幅，係參考年頭當個市仲喺21500水平樓上時計出嚟，當時未有業績可尋，大家純係「靠估」，將經濟復蘇嘅預期全數反映入價內，而當中最大的假設，係其他條件保持不變。因此，當進入3月業績期，公司盈利情況曝光，預期大行又會發功，對大市有新一輪睇法。樂觀意願當然係睇好，但唔好忘記，加息前一般要跌夠先會再上路，到時大行又會否一齊「吹雞」叫沽貨，推低大市一啲都唔奇。
第二，今次加息周期同以往大不同之處，係資訊傾斜同內幕消息史無前例咁發達，市況一有異動，散戶最好都係跟勢出貨先，如果唔係，點會喺上周五人行未有動作，大市下晝3點已開始縮水。另外，投資者要特別留意外滙市場走勢，因為除咗日圓CarryTrade，美金係另一個火頭，稍有風吹草動都對大市有極大影響。
總之，虎年有危有機，贏錢要加倍努力，「牛咁眼」多做功課，勤力出去多聽投資講座，注碼先「小試牛刀」，控制要得宜。
胡孟青