尹志強昨日終不敵病魔逝世，他生前人緣甚廣，眾人對其離世消息哀傷不已，同時也希望尹佬女友米雪和外甥梁漢文要堅強生活下去。
吳國敬
我細細個就睇尹佬踢波，後嚟有機會入明星足球隊，仲可以一齊踢波，球場上嘅佢頭槌好勁，佢以前精神狀態好，每星期都同大家一齊練波，以前一齊出埠踢波，佢除咗做教練指導大家，仲會提攜後輩，成日同我哋傾偈，分享做人道理。
馬海倫
我今早接到尹佬走咗消息，好唔開心，近排雖然冇去探過尹佬，但我一直同米雪保持聯絡。印象中尹佬係明星足球隊歡樂組組長，有佢就有歡樂，佢份人好好，不但對朋友、女朋友，甚至家人都好關心，尤其孝順父母，成日帶佢哋入馬場玩。
張兆輝
同尹佬都係喺明星足球隊時認識，記得06年一齊去德國睇世界盃時，米雪都有同佢一齊去，當時佢健康情況都過得去，佢同米雪食完飯多數返酒店休息。尹佬都係習慣早睡早起，生活好健康，佢又好鍾意小朋友，喺德國佢見到我個仔，成日會請我個仔食雪糕。
薛家燕
尹佬都病咗好耐，但佢鬥志好堅強，早排仲聽講佢可以出院，以為佢好番好多。今日接到佢嘅死訊好突然，我呢排都少聯絡到米雪，不過一陣都會發個短訊慰問吓佢，始終呢個時候佢好需要冷靜一下，我唔想打去騷擾佢。
採訪：林妃
