80后虎口虎面　橫掃胡同

吼！今年屋企虎蹤處處，淨係北京一條煙袋斜街，虎年精品買到兩隻手都拎唔晒。MadeinBeijing的設計張牙舞爪起上嚟，比本土設計更搞鬼更有心思，百變老虎仲可以由頭笠到落腳，老虎上身包你全年虎虎生威，全家生生猛猛！同志們，一齊數數虎年最佳手信龍虎榜。

記者、攝影：尹中午
Model：KKYu@UniqueModel
鳴謝：港龍航空

格仔舖老虎撐腰

短短一條煙袋斜街，清朝時以賣煙袋最出名，今日已被各民族精品店進駐，成為遊客必到商業味甚濃的步行街。不過若細心發掘，還是有好多筍貨執，像這格仔舖「有聲有設」，入面有百多個格仔，自家獨特設計可在此中尋。內有八十年代懷舊小物，當中最搶眼的是XL老虎頭，成呎長獨霸了一個格仔，還以為係公仔頭套，擺上頭頭重腳輕成個不倒翁咁，原來係咕，質地夠舒服，挨住睇電視，唔怕來年無靠山！

3.百幾個格仔由自家設計，八十年代懷舊小玩意都有。（a）

笠實小情人

來自東北的情侶小武同波波，對老虎仔手套情有獨鍾，貪佢外形kawaii，最緊要係毛絨絨的質地啱晒北方凍到震的天氣！情侶一人戴一隻羨煞旁人，另一隻手點算？拖到實互相取暖囉！大手襪以外，仲有迷你版小虎鎖匙包，可套在手指上；另有啡色兔仔手指套，一次過買埋下年的手信都仲得。

2.毛絨絨的虎年手套，人手縫製。$97（a）

5.手指「兔」賣早咗一年喎！$32（a）

6.虎頭虎腦鎖匙包，可以套在手指上。$48（a）

必食紙製品

個人BestBuyNo.1，是紙製炸醬麪、老北京酸奶同烤鴨，唔係畀你燒，係畀你寄，因為那是一張明信片，亦可當作賀年卡祝親朋好友「有大食大、任食唔肥。」全高清製作，睇見都想食，好似西班牙遊客Louisa都話愛不釋口，買咗一大叠返去「大宴親朋」。期待佢出多幾款北京特色美食如宮保雞丁、冰糖葫蘆、涮羊肉、餃子燒餅窩窩頭驢打滾……集齊一套可玩京菜煮飯仔。新年派唔晒咩？七月都啱用o架……

■炸醬麪明信片！$12（a）

串爆上司

金句王襟章「公司的无耻程度總是超出員工的想象」，有同事睇到拍枱叫好，先旨聲明不代表本人立場，但啱晒經常OT又無補水、放假仲要返工、被老細打壓到敢怒不敢言的你作無聲抗議。勇者可主動將它當作金牌頒贈給你的無良僱主，惟事前宜先準備辭職信一封。另備有超樂觀金句「懷才就像懷孕一樣總會被別人發現的」，新年共勉之！

7.金句襟章$12（a）

8.桃花虎靠墊$96（a）

a.有聲有設
地址：西城區後海煙袋斜街67號

4.「有聲有設」店舖充滿傳統中國味。（a）

ToteBag龍頭手信

花花、青花瓷圖案帆布ToteBag，環保又襟污糟，實用度100%，榮登最佳手信龍虎榜第一位。我一次過掃咗十個唔同款，朋友收到個個開心。最盞鬼係麻雀、啤牌圖案，送畀阿爸阿媽搭多一句：「新年贏多啲」，包父母讚你孝順。此店玩味設計源自上海，擅將鬼馬圖案印在T恤、絲巾、環保袋上，早已登上《城市畫報》、《Elle》等雜誌，連S.H.E同Mika都嚟過，你又點可以唔嚟趁吓?!

14. 雙喜帆布ToteBag$84（b）

爭認80後

80後熱血青年抗拒被標籤化，但免費的「我是80后」不織布袋就唔怕孭上身。只要有幫襯就附送此袋，好啱一眾唔認老扮後生的80前和反高鐵80後熱血青年，最好着埋天安門Tee，年初一去特首辦同Donald拜年，大喊：「我後生唔代表我衝動無知！我愛國愛港但我都可以反高鐵！」也可去埋CCTVB，抗議無記不停矮化80後青年。