今日係大年初三，好多人會趁假期最後一日，盡情玩放啲！除咗打牌兼魚蝦蟹，二月仲好多新碟，買番三、五隻，留喺屋企慢慢睇就至嘆！今日搵嚟《72家租客》兩位導演推介過年煲碟王，搞笑、熱鬧、溫情乜題材都有，聽吓佢哋點講！
記者：陳國輝
攝影：伍慶泉
鳴謝：TTCafe
鍾澍佳：一家大細齊齊笑
無論入戲院抑或留喺屋企睇碟，佢話最重要有新年熱鬧氣氛：「記得十幾年前睇成龍齣《紅番區》，由約埋一班朋友、排隊撲飛，直至散場一刻討論劇情，電影、環境再配合氣氛，好似成個Package咁，勁興奮呀！」當然，煲碟相對地無咁熱鬧，但起碼一家大細齊齊睇，有講有笑，一樣有過年嘅濃厚感覺。
老實講，新出賣街嘅笑片唔多，鍾導演只係揀咗宮崎駿齣《波兒》：「我推介呢套電影，係因為卡通片最有創意，尤其佢採用嘅CameraAngle，真實世界係完全做唔到，莫講話對我哋班創作人有幫助，大人細路睇完一樣咁開心！」
葉念琛：情侶檔共賞小品
相對於新年要趕拍《龍鳳店》嘅鍾澍佳，似乎葉念琛更懂得忙裏偷閒。佢話，以往每逢過年，都好鍾意睇周星馳嘅電影，尤其推介《整蠱專家》：「呢齣戲將無厘頭文化、搞笑等歡樂元素，溶入到新年氣氛！」
但係，葉導演已經選擇喺今年過去日本旅行散心，度歲兼過情人節，至於煲碟，都係留番出年先再計劃。新碟之中，佢揀咗《心跳500天》為過年必煲：「大年初一適逢係情人節，幾日悠長假期，當然拍住拖睇愛情喜劇！」葉最欣賞《心》嘅演繹手法，既有電影感，劇情中又加插歌舞環節，番聽懷舊曲，感覺寫意。而佢同鍾導演又異口同聲撐《金瓶梅》，佢話：「劇情未必最好，若然情侶共賞，唔睇有損失囉！」
賀歲影碟逐隻煲
《崖上的波兒》開心靚聲
半年前已推出DVD版，雖然Blu-ray遲咗，但總好過無，尤其日語Audio會採用DTS-HD6.1聲道，效果更靚！
《心跳500天》青春歌舞
一方面以音樂作為演繹故事嘅手法，認真特別；至於影碟版更加入刪剪片段以及加長版本，當然唔可以錯過。
《金瓶梅1及2集》熱血沸騰
普通Blu-ray版尚未推出，珍藏版已搶閘見街，重點係包裝好精美，更內附112頁全彩寫真集，小心睇到流鼻血。
《風雲II》齋試音效
睇完個立體封面，差啲以為佢係3D片！劣評如潮已成事實，但因劇情中有大量後期音效製作，Blu-ray版表現尚算見得人。
《刺陵》見仁見智
有人話，喺戲院睇到中途離場，有無咁差要睇過先知，好彩DVD版內附相集、海報，仲有周董及以林志玲專訪，Fans最啱！
《十月圍城》期待勁作
港產片中期待之作，藍光版同時採用DTS-HD以及DolbyTrueHD兩種7.1聲道，但發覺人聲竟唔夾嘴形，少少失望。
《旺角監獄》影帝影后
Bonus只得預告片同埋製作特輯，基本上唔睇都無損失，最緊要有出爐影帝張家輝同埋影后鮑姐同場演出，趁勢推出有運行。
《潮性辦公室》爆笑舞台
只要路經影碟舖，都見門口播緊詹Sir套舞台劇，《潮》英文名叫「MicroSexOffice」，擺明玩辦公室性事題材，相信有共鳴。
《2012末世預言》CG超強
除咗套戲勁玩CG，影碟Bonus亦夠精彩，例如藍光版就內附「瑪雅曆法互動遊戲」以及有另一個結局，入過戲院仲可以再睇。
《小飛象70週年》經典修復
與迪士尼卡通一樣咁長青，特別一提係，呢隻Blu-ray版並非重新繪畫，只係數碼修復版，高清畫質或令人擔心。
DVDPro（23326326）