踏入虎年，喺我哋體育版唔講頭炷香、第一個虎年B，當然係講邊個球員先發虎威。雲尼斯達萊（雲佬）、基斯坦奴朗拿度（C朗）呢兩個前曼聯球星就合演一幕雙星報喜，分別都喺3分鐘內「起孖」，幫漢堡、皇家馬德里輕鬆贏波，真係要借許氏兄弟喺《雙星報喜》嘅金句：「邊個夠我威？」
助漢堡贏史特加3:1
或者波友會問，明明漢堡贏史特加3:1場波喺年卅晚10點幾開波，點解係虎威？冇錯嘅，當33歲嘅雲佬後備上陣末段完成梅開二度（75、77分鐘），啱啱踏入香港時間初一凌晨無耐。切記呢場不過係佢第2次代表漢堡上陣，一係唔開齋，一開齋就「起孖」，堅勁！
最厲害係漢堡呢場勝仗，終止史特加聯賽5連勝強勢，而雲佬仲要係射破當年嘅英超死敵列文（前阿仙奴門將）大門，邊個夠佢威？雲佬賽後話：「我落場前一路睇住個錶好心急，結果自己兩個入球幫隊波勝出，梗係開心。」
如果話33歲嘅雲佬越老越可愛，咁25歲嘅C朗，自然係如日中天。呢場皇家馬德里炒薩雷斯3蛋，係C朗停賽兩場後首次復出，結果喺69同埋71分鐘兩度接應卡卡傳送「起孖」，今季喺西甲累積11球，睇怕好快超越希古恩（12球）成為隊中首席射手。
C朗入球慶祝復出
教練比歷連奴賽後講出C朗嘅重要性：「雖然喺佢停賽期間我哋兩連勝，但隊波實在需要佢；佢一個人引開好多敵方後防球員，而佢以入球慶祝復出，當然係好事。」
踏入虎年凌晨，特別多球員「起孖」，除咗佢兩個，仲有羅馬中場比基、里爾中場奧拜尼亞克，同海牙前鋒域奇雲丹保等；其中比基兩個入波幫羅馬大炒巴勒莫4:1，聯賽盃賽共20場不敗，睇嚟呢隻「狼」喺虎年仲係咁惡！