鍾鎮濤與女友范姜在牛年年尾增添一名小女兒Eloise，自始阿B即心想事成，連談了兩年談不成的溫拿台灣演唱會也忽然成事，阿B大讚女兒腳頭好。雖然兒子嘉浚長留美國，但他抱着三位寶貝千金，預期虎年會過得開心順利。
鍾鎮濤（阿B）在剛過去的牛年標尾會，女友范姜為他生下小小B女Eloise，家裏多了位新成員，他預期虎年將過得更開心熱鬧。阿B年三十晚已飛往拉斯維加斯登台，無法與子女一起過節，他說：「幾唔捨得都冇法，要搵食嘛，今次去登台都順便參加陳小春個婚禮，之後再同埋兩個細佬去探我媽媽，范姜媽媽就喺台灣嚟香港睇孫囉，兩邊都咁熱鬧。」
稱被打入深冷宮
虎年多了新成員，阿B積極工作，他覺得自己更有幹勁，根本不覺累，但他卻笑謂自己被打入冷宮：「自從鍾懿出世後，佢媽咪就打咗我入冷宮，家多咗個妹，我就入咗更深嘅冷宮，我排第三咋。」阿B嘴裏像埋怨，其實甜入心，他何嘗不是錫女錫到燶，更大讚Eloise腳頭好，阿B說：「我舊年大部份時間做音樂工作，電影好少做，諗住未來一年做張新碟之外，想接番多啲戲啦，點知個女一出世，就有3、4個劇本等緊我揀，真係心想事成。」
鍾懿最識冧父母
阿B大讚Eloise是其幸運小公主，他一晚接三場真銀騷過肥年之外，連溫拿台灣演唱會的計劃傾了兩年都不成，Eloise出世後，主辦單位就說台北小巨蛋有檔期，忽然成事了。
記得05年鍾懿出世，阿B也是不停讚女兒為他帶來好運，他說：「佢嗰啲好運係喺我人生低潮，帶好多歡樂畀全家，生活開心自然冇咁愁。」鍾懿這女兒很會冧父母，有次阿B感冒咳，為免傳染給跟他睡的女兒，故打算背轉面，誰知他還沒轉身，鍾懿竟對他說：「爹哋你擰轉面呀，你咳時我幫你拍拍（背脊）。」阿B說：「嗰嘢真係冧到震，佢仲話我係佢嘅No.1，佢偶像小豬咁靚仔都係排第二，你話我有乜法子唔錫？」
願子女快高長大
阿B說B仔嘉浚常留在美國，現年15歲的B女嘉晴則在台灣讀書，兩個都不在身邊，他說：「佢哋都大個，要畀多啲自由佢哋，唔似得兩個妹咁黐身，同佢哋相處要好似朋友咁囉。」作為父親，阿B的新年願望例牌菜單必有一項子女快高長大，身體健康，而踏入虎年，他也希望事事如意，工作順利。
採訪：JaniceChoi
攝影：ChanChiLam