NBA虎年第一單大交易，就係明星賽東道主小馬，同巫師達成涉及7人交易；小馬用祖舒侯活、古登、昆頓羅斯同辛高頓做籌碼，換來卡朗畢拿、希活同史提芬遜。「總統」阿蘭拿斯無限期停賽，巫師決定重建，今次放走卡朗畢拿、希活等主力，大前鋒占美臣都傳聞列入其他交易，遲吓都隨時走人。
小馬班主古賓恨捧盃恨到發燒，換嚟平均入16.9分嘅小前鋒卡朗畢拿，連埋奴域斯基同泰利，3巨頭平均差不多攞60分，同「綠軍3巨頭」、「湖人4天王」有得揮；但小馬未解決內線得分能力問題，新加盟中鋒希活得分料子一般，自稱聯盟最佳中鋒嘅丹比亞，更淪為球隊負累。
重磅交易點止一單，傳聞騎士同太陽達成協議，騎士以伊古斯卡斯、JJ赫臣做籌碼，交換太陽中鋒A史杜達米亞；如果交易成功，騎士個陣容真係可以媲美東岸明星隊。