新年伊始，祝願讀者財源廣進，虎虎生威。庚寅年頭炮世紀陽光（509），兩個字：「抵搞！」世紀陽光主打肥料及硫酸原料產銷，集團最新NAV0.46元，現價0.38元折讓17.4%。場內肥料相關股份，呢期炒扶農國策Concept，冇折讓之餘，PB起碼1.4倍或樓上，講PB，世紀陽光好吸引。
世紀陽光09年半年度（6月底止）純利爆升2.5倍到1990萬銀人仔，係咁意計數，集團全年純利起個孖到4000萬銀人仔，PE落到18倍。嚟緊日子，集團食住扶農國策，照計業績可以穩步上揚，2010年度純利上返1億銀（06年度講緊1.27億銀人仔），預期PE落返7倍幾單位數。買世紀陽光，以2010年度10倍PE做目標，集團要見0.50元，現價潛在回報率32%。
泛店今年更上層樓
泛海酒店（292）連酒店重估後NAV2.84元，現價0.475元折讓超過80%，酒店股當中，泛店折讓大到離晒譜。又泛店2010年半年度（9月底止）純利勁賺3億銀，就算全年度純利都係呢個水位，泛店PE都係得兩倍幾。再講，呢期報載，話春節酒店大旺，照計泛店2010年度純利應該更上層樓。呢轉冷吼，博泛店升20%到0.57元，泛店折讓仲高達80%。
錢雋