虎年伊始，收到唔少拜年短訊與拜年電話，其一係發行界大哥萬事德，互相恭喜之後，萬事德話過年前聽到電訊界猛虎王維基在新城財經台接受麥萃才教授訪問講寬頻與電視，突然講及一份老牌報紙每日發行幾千份。咁啱得咁蹺，萬事德就係一份老牌報紙嘅總發行，佢對左丁山講：「我日日負責派報紙，知道嘅一定會多過王維基，講電訊與寬頻我就唔識，講報紙發行，麥教授都怕要請教我啩？話畀你聽，王先生一位主要電訊競爭對手透過信託基金係擁有一份老牌報紙嘅，經我手每日發行有好幾萬份，冇花冇假！」
講得咁迂迴做乜吖，咪係講《信報》囉，講暢銷就一定輪唔到佢，講有冇影響力，大家各自判斷可也。至於王維基談及嗰份老牌報紙是否就是《信報》，只有王維基至知道。
又有陳茂波議員來電話，拜年之餘，問佢有意角逐立法會議員出任中文大學校董一事，有冇阻滯？陳議員話佢自己係新亞書院會計系畢業生，一心想加入中大校董會，係為母校服務而已，點知原來要「競選」嘅，係佢意料所不及之事。關於呢樣嘢，左丁山可能知得比佢更多，立法會每屆選人進入各大學校董會，係泛民、民建聯工聯會及其他（自由黨，專業派等等）各自派一人。中大有三個立法會議員校董，故此歷屆立法會改選後，皆如此運作。二○○八年張文光做咗六年中大校董，按慣例退出，泛民本安排余若薇入中大校董會，但有有心人提名黃毓民，余若薇唔想爭，於是話無意做中大校董，黃毓民在泛民派自動「當選」為中大校董，自由黨就派出張宇人，民建聯派出陳克勤，大家派餅仔而已。聽講張宇人入中大校董會後，好肯捱義氣，舉凡涉及中大修例之事，皆由張宇人在立法會內提出議案，中大好多謝佢。
陳茂波係新科議員，不知就裏，見黃毓民辭職，空出中大校董會席位，於是表示有意出任，點知就咁篤破人哋派餅仔之安排，受到某方面攻擊，做大學校董，不會增強議員下次競選之本錢，只會增加佢之工作量，陳茂波係中大校友，想做立法會議員嘅代表進入中大校董會，好正路啫，據悉有好多中大校友支持佢。