異見人士劉曉波、維權人士譚作人慘陷寃獄，家家戶戶慶團年之際，兩人卻要喺獄中度過，民主黨幾個成員前日特別買咗兩包糖果送到政府總部，要求港府駐京辦轉交劉曉波同譚作人，當作香港人送出新年禮物，等佢哋知道好多香港人關心他們情況。
港府同北京一樣咁冇情，拒絕接收糖果，民主黨總幹事陳家偉話工作人員初時話唔收食品，又聲稱唔知如何轉交，幾個民主黨代表認為呢啲藉口好荒謬，在政府總部外靜坐近45分鐘，工作人員請示上頭後，告知必須寫明糖果係交畀政制及內地事務局局長林瑞麟，林局長會指示駐京辦轉交，既然林D9願意做郵差，民主黨一於交託畀佢，希望佢不負所託。