今日年初一，係虎年第一日，但如果依足農曆節氣計算，立春之日就係牛去虎來之日，由二月四日開始已算是虎年。立春時辰係二○一○年二月四日早上六時四十八分，計八字就係庚寅年，戊寅月，乙酉日，己卯時，日元屬乙陰木。
本來唔敢再寫呢啲嘢嘅，下下要拉八卦邱講解，有啲煩。但新年前沙田跑馬，碰到紫微楊，佢話以前專欄作品就快結集出書，叫做「紫微徑」，行將發行。左丁山聽錯咗係「紫微勁」，連聲叫好，話有時代潮流氣息，出版總編輯P即時糾正：「喂，書名紫微徑，唔係紫微勁！」哦，可惜也，下次紫微楊有新馬登場，不如就叫做「紫微勁」。紫微楊睇得起，竟然話：「你仲唔寫虎年流年o架，有人睇嘅噃！」嚇得左丁山不知如何是好，在佢面前，邊度敢話識斗數、子平呀。不過既然紫微楊吩咐到，唯有硬着頭皮，再搵八卦邱評論虎年立春一番。
八卦邱話：「依書直說，立春日正月乙木，乙乃陰木，花草之木，非大樹之陽木甲木。春天花草，最緊要有丙火（太陽）照暖，有日光花草至可以欣欣向榮，同時亦要有雨水灌溉，滋潤其根，方能生長正常，不斷壯大。嗱，睇番八字，有四木（寅寅乙卯）、有二金（庚酉），有二土（戊己），缺水缺火，不過寅木內藏丙火，算有陽光照耀，只是四柱八字不見水，勉強可講乙酉嘅納音係泉中水，泉水自然可以灌溉花草嘅。」
八卦邱嘅結論就係呢棵乙木有先天不足之處，雖有寅卯（木）扶持，暗中有陽光丙火照住，但難以獨立成長，加上有庚酉金剋制，煩惱甚多，流年麻麻哋啦。
顯然全年係不過不失之局，發又唔發得去邊，壞又壞唔晒，今年樂得清靜，唔好野心大大，強出頭反易受劈。此外，寅年屬虎，偏偏天干為庚金，金可剋木，故此老虎受制於上，唔惡得出樣。如以時年之天干代表阿爺，阿爺今年係庚金，剋晒寅乙卯木，一發惡就人人受制，幾難郁，睇嚟政局如此，嘈吵多而一事難成。如何解救，要請教紫微楊。